Choller y ambulantenan ta di remata

Riba e prome dia di siman, dialuna, Polisnan a haya nan mes ta atende diferente caso di choller of ambulantenan problematica. Tin di nan no ta prome biaha cu mester a bay asistencia pa nan den e ultimo simannan.

Dialuna mainta tempran Polis ta wordo manda na Weg Tooi Hundo unda lo tin un situacion peligroso.

Pa mas o menos 7.30 e Central di Polis ta haya yamada di un docente Fontein kleuterschool, kende ta conta nan cu tin un choller canando rond, riba parkeerplaats di e scol, cu un cuchiu den su man.

Un rato despues ta drenta un otro yamada, pero di un colega di e Polisnan, kende ta bisa cu un muhe bisti na berde, ta canando pia abou y cu un cuchiu grandi den su man. Segun e colega, e tabata den bisindario di e scol ainda.

Yegando na e sitio, e Polisnan di leu ta mira cu ta trata di e muhe MLH di 56 aña. Na momento cu el a mira, el a laga e cuchiu cay y a cuminsa core, pero no mas lihe cu e Polisnan cu a logra areste. El a wordo deteni pa posesion di un arma blanco y e arma aki a wordo confisca. A transporta MLH pa warda di Polis unda cu el a wordo presenta dilanti fiscal auxiliar y a keda deteni.

E otro choller ta e conocido di Polis Mona, kende siman pasa caba a haya su mes envolvi cu Polis. E biaha aki dialuna pa 11.50 di mainta patruya ta wordo para door di un homber di inicial Z. El a conta nan cu ora cu el a yega su cas, den Ruysdaelstraat, el a topa e ambulante “Mona” saliendo di su cas. Na primera bista,e no a mira cu e falta algo. Asina mes a detene Mona pa intento di robo y  hibe warda di polis, unda el a wordo presenta dilanti fiscal auxiliar.

Na Savaneta tambe Polisnan mester a atende caso di algun adicto cu a haya problema cu otro na ex Hotel Roys, y unda cu un di nan a resulta cu un corta na su brasa.

Esaki a sosode pa 1’or di merdia.

Patruya tabata pasando den e area ora cu nan a mira e homber di inicial F.Th, kende tabatin un obheto den su man y tabata haci movecion pa tire esaki direccion di un Nissan Sunny (blanco), cu ta pertenece na e homber A.Th., conoci como Patan.

E homber F.Th a declara cu e homber HBH, conoci como Howie, a corta of hinke cu un machete. Polisnan a mira cu e tin un lesion na su brasa robes parti ariba. Howie tabatin un obheto di punta, largo y di  hero y tambe un obheto preto largo den su mannan. Polisnan mas cu un biaha  mester a orde’e pa tira e cosnan na suela. Howie a declara cu F.Th. a trata di dale cu un botter. F.Th tabata mustra di tabata bou influencia di un of otro droga y a bisa Polisnan cu Howie debe placa. E tabata completamente for di sla y tabata cana ariba’bou y despues a bay for di e sitio.

E obhetonan cu Howie tabatin den su man, a wordo confisca y hibe pa warda di Polis.

Dialuna den oranan di merdia un biaha mas Polis ta wordo manda den bisindario di AMC Unicon na final di caya grandi na San Nicolas p aun caso di destruccion.

Central a informa e patruya cu un biaha mas e homber ambulante ACB tabata causando problema. El a dal e vitrina di e negoshi cu un botter y a kibra esaki.

Na e sitio e Polisnan ta papia cu e señora LAI y ta mustra nan e vitrina y un botter  di Heineken tira na suela. No a kibra e glas.

E sospechoso tabata sinta banda di e hotel den construccion, dilanti e negoshi. Polisnan a papia cune riba su comportacion y a core cune for di e sitio.

E ultimo persona ambulante, adicto cu Polisnan mester a atende tabata na Playa, den bisindario di Moonlight Bar & Restaurant.

Pa 5.50 di atardi Central ta manda un patruya na Morocho Supermarket pa problema cu un choller fastioso. Na e sitio, e patruya ta topa cu e conoci do di nan, e homber LT. Conoci como Shakira den e bar Moonlight. E señora doño di e negoshi a bisa Polisnan cu Shakira tabata molestia un di su clientenan pa e haya un cerbez.

Polis a papia cu Shakira cu tabata na e sitio ainda. El a mustra comprension y a bay for di e luga.

 

Leave a Reply

Top