Comision Condecoracion Real ta extende fecha di entrega di proposicion pa dia 17 di augustus proximo

Comision Condecoracion Real Aruba a tuma nota di e interes grandi cu tin pa propone candidatonan p’e acto di Condecoracion Real y a dicidi di extende e fecha di entrega di e formularionan pa dia 17 di augustus.
Di e forma aki ta duna e pueblo di Aruba mas espacio pa caba di yena e formulario y entrega esaki bek na balie di Bestuurskantoor na Oranjestad.

Tur aña, specialmente na ocasion di hacimento di aña di Rey, ta otorga Condecoracion Real. Esaki ta otorga dor di Rey Willem Alexander. Na Aruba tambe por haci un peticion pa un Condecoracion Real.

Ta trata e peticionnan na Aruba prome y despues ta manda nan Hulanda, caminda e decision final ta tuma lugar.
Tin dos ordo di Condecoracion Real, Ordo di “Oranje Nassau” y ordo di “Nederlandse Leeuw”.

E gradonan mas otorga den “Oranje Nassau”ta ‘Lid” y “Ridder”. E ordo aki conoce tambe e gradonan “officier”, “Commandeur”, “Groot-Officier”, y “Ridder-Grootkruis”.

P’e otro ordo, esta e ordo di “Nederlandse Leeuw, un persona mester tin prestacionnan super extra-ordinario y di caracter excepcional. E ordo aki tambe conoce diferente rango.
Kende ta bin na remarke pa un Condecoracion Real? Tur esnan cu ta haci trabao boluntario pa mas cu 15 aña, pa cua nan no a of ta ricibi salario.
Tambe personanan cu a sirbi y contribui grandemente na bienestar y desaroyo di nos pais Aruba.
Con ta propone un persona?

Por haci un proposicion dor di yena dos formulario cu ta special p’esaki. E formularionan ta obtenibel durante oranan di oficina na balie di Bestuurskantoor na O’Stad of San Nicolas y tambe via e-mail decoratieciearuba@hotmail.com of por yama sra. F. Perez-Lopez na tel 583-8425 pa mas info.
Tambe ta posibel pa download e formularionan for di e websitenan di Gobierno: www.overheid.aw, www.gobierno.aw y www.government.aw .
Riba e homepage tin e noticia tocante Condecoracion Real ora click pa habri esaki pa les’e , tin e oportunidad di download e formularionan. Tambe dor di click riba: actueel – nieuws; actualidad – noticia; news – news, por lesa e noticia y por download e formularionan.

Comision Condecoracion Real ta enfatisa cu ultimo dia pa entrega e peticionnan bek na balie di Bestuurskantoor O’Stad ta diabierna 17 di augustus 2018.

Comision Condecoracion Real Aruba ta resorta bou Ministerio di Prome Minister di Aruba, sra. mr. Evelyn Wever-Croes.
Na Aruba e comision Condecoracion Real ta encarga cu tur peticion cu drenta y pa duna tur informacion necesario.
Aruba ban propone nos hendenan,ban duna honor na esnan cu merece honor!!!!!!

Leave a Reply

Top