Crystal Pool Services N.V. a gana bid pa renoba Piscina Olimpico Rolly Bisslik

St. Fundacion Lotto pa Deporte a reuni cu Fundacion Facilidadnan Deportivo y Fundacion Arubiano pa Maneho di Facilidadnan Deportivo unda a anuncia e compania cu lo renoba Piscina Olimpico Rolly Bisslik. E compania Crystal Pool Services N.V. a gana e bid despues di un evaluacion y a ricibi e aprobacion di ACE Engineering. E proyecto aki lo tin un balor di 1.050.000 florin y tin un duracion di 180 dia, esta 6 luna. Tambe tin cierto condicionnan hancra cu e acuerdo aki y pa cu esaki e compania lo mester cumpli cu nan.

 

Presidente di St. Fundacion Lotto pa Deporte, mr. Di-Stefano Wernet RA tabata contento cu nan por a yuda hunto cu tur otro partner p’e renobacion di e piscina di Savaneta. FLpD ta considera e proyecto aki hopi importante pa Savaneta, unda lo bay cambia bida di e piscina. E piscina aki ta uno olimpico y e atletanancu ta destaca internacional como nacional por haci bon uzo di dje. Tambe e muchanan di scolnan y el a stimula pa bay internacional cu e piscina di Savaneta, pa asina paisnan cu tin winter por bin train aki. Por cera bon acuerdo cu e gobiernonan of federacionnan di e pais. Di-Stefano Wernet a manda palabranan di pabien p’e bario di Savaneta, e directiva y e clubnan.

 

Rolando “Rolly” Bisslik, miembro di Fundacion Facilidadnan Deportivo di Aruba (FFD) a indica e renobacion di e piscina pa e atletanan di landamento ta nifica cu e tin un continuidad pa futuro. Pa dia hopi atleta ta haci uzo di e facilidad pa nan training y si nan cera e facilidad, unda e atletanan lo bay. “A base di negligencia, el a escala den e forma aki. Lamentabel pero mi ta contento cu por fin nos ta mira luz cu drechamento di e proyecto y pa futuro mucho mas lo bay bin y ta boga pa mas grandi”, asina el a expresa.

 

Tim Smit hunto cu su señora ta doño di Crystal Pool Services N.V. y nan a gana e bid pa renoba e piscina y a indica cu e ekipo di e facilidad ta bieu, e ta leak y e no ta automatic. Tambe e sistema di energia no eficiente, nan no tin “chemical automation” y e proyecto nobo aki lo dura 90 dia pa por cambia henter e ekipo te cu e pomproom. El a sigui splica cu nan lo bay kita tur ekipo bieu y lo bay pone pompnan nobo cu ta energia eficiente computer, di cua nan lo tin mas forsa pero lo uza menos energia y asina aki lo save mas placa. Tur material lo ta nobo y esaki ta e meta di e proyecto unda lo crea un “safe, energy efficient, durable y chemically benefit project” den 90 dia.

 

Gerald Franca, Presidente di directiva di Piscina Olimpico Rolly Bislik a splica cu nan a mira e necesidad di renoba e facilidad y a bin cu WEB, cu a haci un analisis p’e directiva. WEB a presenta esaki na nan y asina aki Minister Demisionario dr. Carlos Alex Schwengle hunto cu directiva a sinta cu FLpD pa mehora e servicio di piscina. A haya esaki pa motibo cu e producto di e piscina no ta bon mas y mester haci renobacion grandi. A yega na un acuerdo cu FLpD cual e fundacion lo patrocina e proyecto aki, asina Gerald Franca a expresa.

 

E renobacion ta algo urgente pasobra no solamente e localnan ta haci uzo di e piscina pero e scolnan tambe, clubnan di landamento cu ta hopi. Mas o menos 3000 mucha ta haci uzo di e piscina di Savaneta y ta necesario p’e ta bon condicion. Tambe ta haci uzo di e piscina aki pa competencianan internacional. Presidente di e directiva a expresa cu pa otro aña tin e posibilidad cu Aruba lo tene e Caribbean Islands Swimming Championships (CISC), unda cu lo tin entre 200 pa 300 landado cu ta bin di exterior. Den temporada di winter, varios team y no solamente di Merca of Canada, tambe for di Europa. Pa cu esaki tin necesidad di renobacion pa Aruba y p’e atletanan, pero specialmente p’e scolnan.

 

 

Top