Cu su debido celebracion APA a ricibi e di 700 mil turista crucero

E yegada di e di 700 mil pasahero di crucero na Aruba, ta algo historico pa Aruba y ta resultado di e esfuersonan grandi cu Aruba Ports Authority (APA) a bin ta haciendo cu partnernan di e sector, y cu apoyo di Gobierno di Aruba.

Turismo crucero ta un parti importante di e pilar economico pa Aruba. Informenan cu ta disponibel pa tur hende, ta mustra e contribucion grandi cu e sector aki tin na economia di Aruba. Ta premira cu pa e aña’ki, cu e aumento di e bishitantenan, Aruba lo bay ricibi mas cu 85 miyon dollar for di e sector aki. Si compare cu e cifranan di 2016, esaki ta un aumento di un poco mas di 20%.

“APA a bin ta cambiando e concepto di un temporada halto y temporada abou den sector crucero. Nos a bishita diferente conferencia di cruceronan pero tambe a reuni cu partnernan importante, doño di barconan grandi, y dunando incentivo specialmente den e “slow season pa mira un bishita stabiel di barconan crucero durante henter aña na Aruba. E esfuersonan aki a cuminsa wordo sinti caba, den e aumento di bishitantenan y cu awe nos a logra yega na e di 700 mil bishitante. Esaki no ta cla, ya cu ta cosnan grandi tin pa yega ainda.” Asina Jossy Figaroa, director di APA, a expresa.
Cifra y datonan di ultimo añanan ta mustra cu barconan ta birando mas grandi. Por ehempel, den 2016 Aruba a ricibi 307 barco crucero cu un averahe di 2137 pasahero pa barco, mientras cu 2013 tabata e aña cu mas barco a yega Aruba, un total di 353, pero e cantidad averahe di pasahero pa barco tabata 1951. Den esaki ta bay mira cambio, cu desaroyo di barconan hopi mas moderno y mas grandi. Esaki ta motibo tambe cu APA a bin ta desaroyando waf di crucero cu un infrastructura pa por acomoda e barconan grandi aki y ta trahando hunto cu diferente stakeholder, di cual Gobierno ta e principal, den un cambio pa henter e area unda e cruceronan ta mara. Esaki hunto cu e esfuersonan di APA y ATA pa trece mas barco y turista crucero, ta yuda na crea un sector mas sostenibel pa futuro di e pais.
APA kier felicita pueblo di Aruba y gradici un y tur cu ta traha den e sector aki, of cu ta duna un contribucion pa e bishitantenan aki hiba un imagen hopi agradabel di Aruba

 

Leave a Reply

Top