Delegacion di ciclismo na campo di entrenamento UCI WCC Satellite na Mar del Plata, Argentina

Aña pasa un delegacion di Aruba den deporte di ciclismo a atende un campo di entrenamento na Argentina, ofreci pa Federacion Mundial di Ciclismo UCI.

E aña aki un bes mas Aruba a haya e oportunidad di bishita e mesun campo di entrenamento dianan 26 di november pa 9 di december unda lo entrena n’e UCI WCC Satellite Mar del Plata, Argentina, bou guia di expertonan di Centro Mundial di Ciclismo.

 

E campo di entrenamento aki su specialidad ta identifica y desaroya talentonan den e deporte di ciclismo como tambe un curso pa coach na nivel mundial. Aki cada atleta tin e oportunidad di desaroya su potencial den ciclismo bou guia profesional sin conta e entrenamentonan cu lo ta uno di calidad super halto.

Pa loke t’e curso di e coach esaki lo ta di nivel 1 y 2. E aña aki pa Aruba a participa e ciclistanan prospecto Akeem Kock y Anthony Wilson hunto cu coach di ciclismo George Winterdaal kende a forma parti di e campo di entrenamento aki.

 

Mester bisa cu nos atletanan di ciclismo semper a demostra un bon nivel di desaroyo unda cu a keda comproba cu nos tin talentonan cu por competi cu lo demas sigur den nos region y continente.

Mirando e bon calidad di nos ciclistanan tin futuro, pero tambe nos mester traha riba un bon planificacion di infrastructura p’asina nos atletanan por bira mihor ainda pa loke nan ta caba.

Pa un mihor formacion y desaroyo mester pensa riba un propio pista di ciclismo cual sin duda ta un prioridad.

Un danki sigur na Lotto, e Loteria di Aruba pa medio di St. Sportsubsidie Aruba cu a subsidia e biahe di e delegacion di ciclismo p’e UCI WCC Satellite Program cu lo tuma lugar na Mar del Plata, Argentina.

 

Leave a Reply

Top