Di acuerdo cu AAA No a scoge ainda un operador nobo pa Aviacion General

Contrario na publicacion di ayera di AWEMainta

 

“No tin ningun negociacion tumando luga cu un operador nobo, pasobra ainda no a scoge un operador manera e proceso di Request For Proposal (RFP) ta stipula, asina Aruba Airport Authority N.V. (AAA) a reacciona relaciona cu e publicacion di AWEMainta rond di e proceso di e bidding pa opera Aviacion General na Aruba.

 

AAA a tuma nota di un articulo publica tocante e proceso di haci oferta pa por opera e terminal di FBO/General Aviation (GA) na Aeropuerto Internacional Reina Beatrix.

Berdad cu e acuerdo di concesion cu actualmente AAA tin cu Universal Aviation Aruba N.V. lo termina 31 di december 2017.

Como resultado AAA publicamente, tanto local y internacionalmente a emiti e proceso di “Request For Proposal” (RFP) na september di 2017.

 

Proposicionnan a wordo ricibi siman pasa for di e varios compania interesa den opera e terminal di FBO/GA.

Actualmente AAA ta evaluando tur e proposicionnan ricibi y e decision final ta plania pa wordo tuma dentro di algun siman.

Si t’asina cu mester agrega cu a lanta interogatorio despues cu diabierna ultimo a sali un avion priva cu un di e interesadonan pa opera e Aeropuerto priva di Aruba.

Den e avion aki a bula e partner Mericano, Ignacio Ramirez di WinstorJet,  e partner local Gigi Helder di e compania AGS-Fast y Minister Otmar Oduber, tur acompaña pa nan casa.

 

E vuelo tabata di Aruba pa Fort Lauderdale. Kico e mandatario, Otmar Oduber tin di haci cu e proceso di destaho of di e compania interesa den maneha e terminal di “General Aviation” no ta conoci. Cu un Minister ta acepta pa bula den un avion priva di un compania cu kier gana un destaho di Gobierno (AAA ta un NV di Gobierno) ta un asunto hopi cuestionabel, specialmente si e grupo aki gana e destaho despues.

 

Ta bon pa informa acerca cu un di e companianan participando den e mesun destaho aki pa opera e terminal di General Aviation ta SkyPort Aruba, un compania cu ta pertenece na FMSA y Refineria di Aruba. Manera ta conoci, FMSA ta distribuidor exclusivo di combustibel pa avionnan na Aeropuerto. FMSA ta pertenece na Refineria di Aruba NV, cu ta 100% di Gobierno di Aruba tambe.

Loke nos por bisa ta, cu e compania Jetex di Brazil ta masha interesa pa bira e proximo distribuidor di combustibel na Aeropuerto Internacional di Aruba. Su representante tabata na Aruba siman pasa.

Pesey, den cierto forma, Gobierno mes ta interesa pa via SkyPort maneha e terminal di FOB/GA di nos isla.

 

Awor cu AAA N.V. ta sali bisa cu no tin ningun decision ainda, ta haci e envolvimento di Minister Otmar Oduber den e proceso aki, mas cuestionabel ainda.

Tambe ta conoci cu sr. Ignacio Martinez, ta masha ayega n’e compania di aviacion Arubano, Aruba Airlines. AAA no a tuma un decision ainda riba kende of cua compania lo bira e proximo operador pa maneha e terminal entrante 1 di januari 2018. Decision lo cay den proximo dianan.

Den esaki no ta Minister Otmar Oduber tin ultimo palabra, pero ta Minister Dangui Oduber, kende no ta ser envolvi mes.

 

 

Leave a Reply

Top