Dia 6 di januari ultimo un directiva nobo a wordo elegi pa Aruba Judo Bond

 

E directiva a wordo elegi segun articulo 9 di e statuto di Aruba Judo Bond, cu ta bisa cu si e directiva nenga di tene un Asamblea General pa eleccion di un directiva nobo, un miembro di AJB por yama esaki y den e caso aki Judo Center Tanki Leendert, cu ta unico miembro legal cu derecho di voto, a hasi esaki según tur reglanan di statuto y legal.

 

E directiva cu a wordo elegi ta:

Presidente:                        Kinsasha van der Bliek

1e vicepresidente:             Jaime Winterdal

2º vicepresidente:              Rudy Vrolijk

Secretaria:                         Dolores Thiel

Tesorero:                           Jaime Mata

Comisarionan:                    Marlon Petrocchi

Rachelle Ridderstap

Ricky Croes

Idelle Hernandez

 

Dia 11 di januari Aruba Judo Bond a tene un conferencia di Prensa y a presenta e miembronan di directiva y tambe Presidente a elabora riba meta y planes cu e directiva tin pa cu e deporte di Judo.

Den su discurso sra. Van der Bliek a bisa cu primordialmente e ta sumamente agradecido di tin un tremendo team cu curason pa judo pa asina  por logra desaroya y hiba e deporte di judo dilanti y tambe hiba nomber di Aruba dilanti internacionalmente cu e deporte di judo. E ta sigur di por papia pa directiva den su totalidad ora e bisa cu nos ta sumamente agradecido pa e confianza deposita den nos y sigur honra cu esaki.

 

Aunke cu ta un momento cu una bes mas nos ta mira speransa pa nos deporte e ta  lamenta cu directiva anterior no a mantene su mes na statutonan di AJB y asina e elección aki mester a wordo yama cu un asamblea extraordinario. Esaki no ta prome biaha cu un miembro di AJB ta haña su mes tin cu forsa un elección pa asina scapa e deporte di judo akinan na Aruba, pero si nos kier segura, cu esaki ta ultimo biaha cu un elección tin cu tuma lugar den e forma aki. Por ta sigur cu den e directiva nobo cada un persona cu ta forma parti kier sigi dilanti den e spirito di judo cual ta respet y armonía.

 

Den Aruba Judo Bond respet y armonia ta bay ta un bes mas e norma pa mantene na dje, respet pa nos maestro nan den judo, pa mustra y brinda e respet na nos pioneronan di judo y cu lo inverti energía den unión y armonía e un cu otro enbes di ta constantemente bringando otro, cu lo sostene esnan cu kier traha duru y pasa e trayecto corecto pa desaroya nan mes den e deporte di judo. Nos sigur ta keda den e mesun disposición pa cu tur persona cu ta desea di aporta na judo, nos tin varios funcion den comision nan cu mester jena y sigur nos tin mester tur e ayudo cu tin disponibel. E trabou nos dilanti ta grandi pa un bes mas restaura e deporte di judo y pa sigi desaroya judo na un nivel di excelencia. E kier hasi un petición na tur persona cu ta desea di aporta na judo den cualkier forma y pa tur club di judo formalisa of informal y na tur black belt judoka cu ta desea di sigi desaroya nan mes y asina aporta na nan deporte di judo pa por fabor notifica nan mes na AJB via di e-mail adres arubajudobond.2018@gmail.com

 

Posibilidadnan pa sigi crese y desaroya den e deporte di judo ta grandi, Aruba Judo Bond mester di persona nan cu curason pa bienestar general di judo, cu kier sigi desaroya nan mes pa asina nan por inverti nan conosemento bek den e deporte.

Nos ta desea di por crese den miembrecia y pa esaki AJB ta pone su mes na disposición pa sostene tur club cu tin necesidad di formalisa su mes. Planes nan ta grandi pero ainda directiva ta den temporada di traspaso y lo mester reuni ainda pa hunto jega na un plan di maneho excelente y sigur AJB lo comparti e planes nan aki cu publico una bes cu directiva a reuni y acorda esakinan.

 

Directiva elegi di AJB ta hasi un apelación na directiva saliente pa por fabor coopera cu e traspaso pa asina no perhudica nos muchanan y primordialmente nos atletanan cu ta den nan ciclo olímpico. Directiva ta desea di por enfoca tur su energía y poco recurso cu nos tin den nos muchanan y den e desaroyo di e deporte di judo y no den mester tuma pasonan drástico pa segura cu directiva saliente cumpli cu e traspaso. Aruba Judo Bond kier gradici tur esnan cu a aporta na hasi e eleccion posibel y tambe  gradici pa e confianza duna e directiva. Nos ta gradici Judo Center Tanki Leendert pa a pone nan centro di entrenamiento na disposición di AJB pa por a presenta e directiva nobo. Sra. Van der Bliek ta gradici e miembronan di directiva pa e tremendo esfuerso den corto tempo. Tremendo disposición pa traha hunto y pa duna di nan tempo liber voluntariamente pa aporta na e deporte di judo. Tambe e ta gradisi tur miembro di prensa cu a mustra interes y ta presente na e conferencia di prensa awe.

Leave a Reply

Top