Dos accidente riba Green Corridor – Chauffeur bou influencia a perde control cu auto y ranca palo di luz na Wayaca

Diadomingo mainta algo prome cu 8’or polis y ambulance a bay schuin tegenover di Wayaca Falls, caminda un auto a ranca un palo di lus. Segune informe, lo tin un persona herida.

Na yegada di polis ya ambulance tawata na e sitio tratando e herido.

Ta parce cu e auto biniendo di pabou pa un of otro motibo a hala na su man robes y subi e separacion di e caminda principal, rancando e palo di luz.

Den e auto tawata tin dos homber, di cual un di nan a keda herida. Polis a laga e chauffeur supla y despues a bay over na detene pa motibo cu e tawata burachi. Ambulance a transporta su amigo pa hospital.

Esaki ta di dos auto cu ta accidenta pa e weekend aki casi mesun manera ariba e green corridor.

Diasabra marduga algo prome cu 1’or patruya di Santa Cruz ta topa cu un auto cu a accidenta.

Esaki tawata ariba e caminda cu ta core entre rotonde Sero Tijshi y bay caba na Barcadera. Muy probablemente velocidad halto, a causa cu e chauffeur a perde control ariba su Mitsubishi Lancer.

Den e incidente e auto ta kita bay na su man robes y ta subi ranca y destrui basta cadushi y aloë, pa despues bay para ariba e caminda cu ta bay nort.

Por a wak cu e impacto tawata uno duro door cu e windshield a kibra, pero asina mes e chauffeur no a sufri niun lesion.

 

Leave a Reply

Top