Dowers: Gobierno di Mike Eman ta atendiendo cu e problema di Venezuela for di 2015

Durante e conferencia di prensa diamars di fraccion di AVP Parlamentario di AVP Arthur Dowers a reacciona riba ponencia di Prome Minister Evelyne Wever Croes, kende a menciona cu lo tin 12 mil Venezolano ilegal na Aruba. Pa e ex Minister di Husticia esaki ta un hilaridad, un berguensa cu un mandatario ta duna un declaracion asina pa despues bisa cu e no ta sigur di e cifra aki, ora cu palo a cuminsa cay.
E ta tristo, Dowers a bisa, pasobra e cifranan ta disponibel y su persona mes por a duna Wever Croes e cifranan si el a pidie. Of si el puntra e hefenan di departamento, ya cu for di momento cu e problemanan a cuminsa escala na Venezuela Gobierno di Mike Eman a cuminsa tuma e pasonan necesario pa sigui e situacion di cerca, principalmente pa mira si tin un yegada grandi di ciudadanonan di e pais aki.
A cuminsa analisa e situacion for di 2015 ora cu tabatin denuncia ta wordo haci cu tin hopi Venezolano ta canando cu nan maleta riba caya, cu nan ta drumi na beach y cu ta bini Aruba simplemente pa swipe nan carchi, saca dollars y bay Venezuela haci negoshi cu esaki. AWEMainta tin cu remarca cu e tempo ey cu tabata hiba dollars Venezuela, no a tende Maduro ta keha of haci denuncia.
Den e conferencia Dowers a bisa cu e tempo ey oposicion a bisa cu Venezolanonan ta invadi Aruba. E cifranan cu e tin na su disposicion ta mustra cu e tempo ey Aruba a ricibi 1.2 miyon turista y di esaki 378.731 ta turista Venezolano cu a bini. Tabata controla cuanto a drenta y cuanto a sali, na final di aña. Na final a sali 377.700. Pues por calcula cu un poco mas cu 1000 turista a keda atras.
E cifranan di 2016 ta indica cu 1.1 miyon turista a drenta Aruba y di esaki 230.149 tabata Venezolano y un cantidad similar a sali, locual ta mustra cu algun shen turista Venezolano a keda atras. Pero mester tene cuenta cu na januari tin mas turista cu ta bandona Aruba cu locual ta drenta. Esaki ta nifica cu e Venezolanonan ta bandona e isla bek na inicio di aña. Pesey e cifranan di januari y februari ta mustra cu ta sali mas turista compara cu esnan cu ta drenta. Haciendo un analisis, por saca afo cu loke por a keda atras ta entre 1000 y 1500 turista den tur e añanan. Pues no por bisa cu tin 12 mil turista cu a keda atras.
Tampoco por bisa cu tur e hendenan cu a keda atras ta ilegal, pasobra nan por a drenta como turista y kisas a haya un permiso pa keda mas largo of a haya otro tipo di vergunning.
Pa loke ta e cifranan 2017, te cu juli, a drenta 54493 y a sali 56.602 turista Venezolano cu a drenta. E conclusion por ta cu e maneho hiba a demotiva e Venezolanonan pa drenta Aruba como turista y keda atras. E cifra di e salida, ta compensa e cifra menor di Venezolanonan cu a bandona Aruba na december 2016. Probablemente pasobra nan a sali den luna di januari, 2017.
Pues analisando e cifranan aki, nunca ta yega na un cifra di 12 mil Venezolano cu a keda ilegal atras. Mencionando e cifra aki y pa despues bisa cu e no ta sigur, ta un berguensa pasobra e ta mustra cu e no ta haciendo su huiswerk bon.
Dowers a sigui splica cu na aña 2015 a nenga entrada na 1500 turista y di esaki 1375 tabata Venezolano. Esaki pasobra Gobierno a cuminsa hiba un maneho hopi mas estricto pa preveni cu e hendenan sin entrada ta keda atras. Na 2016 a nenga entrada na 1444, di esaki 1200 tabata Venezolano. Na 2017 te cu luna di juli a nenga entrada na 417 turista di cual 289 ta Venezolano. Pues menos di e hendenan a cuminsa trata di drenta door di e maneho cu mester tin cierto cantidad di placa pa drenta Aruba. Na aña 2017 a deporta 417 Venezolano.

E problema di Venezolanonan y ilegalidad ta un reto pa tur e paisnan di Reino den Caribe, pa cual Aruba a hiba un maneho hopi estricto. A percura pa e departamentonan wordo fortalece cu mas personal, pero a kita algun di nan, sin cu nan tabata sa cuanto ilegal tabatin. No a bay tuma un “briefing” di e departamentonan concerni riba e situacion den e area y tur e peligronan cu esaki por trece cune.
Pa combati criminalidad y ilegalidad, a pone Kustwacht funciona 24/7, a pone un radar adicional pa cubri henter e area di Aruba, pa mitiga e riesgonan ya menciona.
Pa Dowers ta hopi straño cu den tur e reunionnan cu Wever Croes a tene como Informador, Formador y Prome Minister, e ta bisa di no tin ningun informacion oficial. Pesey ta un berguensa hopi grandi pa Aruba cu un Prome Minister ta bay papia di 12 ilegal pero ta bisa na mesun momento cu e no sa si esaki ta corecto.

Leave a Reply

Top