Durante cu patruya policial tabata busca atracadornan di Rey Hing, A topa cu personanan indocumenta na un auto

Diamars algo pasa di 12’or y mey di madruga, durante cu e patruyanan di San Nicolas tabata buscando e atracadornan cu un rato prome a comete un atraco arma na Rey Hing Bar & Restaurant. Nan ta bin topa cu un auto Toyota Mark X color shinishi staciona patras di e bar na Mangel Halto.
E agentenan ta mira con dos dama ta sali for di e auto y ta core drenta den e matanan di mangel.
Den e auto polis ta topa cu dos homber cu ta papia Spaño. Un di e damanan ta sali for di e mata di mangel y mesora Polis ta detene e dama y un homber. Aparentemente ambos no tin nan papelnan na ordo.
Ambos a wordo transporta cu transportwagen pa Warda di Polis na San Nicolas.

Siguiendo cu nan investigacion mesun diamars algo pasa di 1’or di marduga, Polis ta wordo informa cu riba e caminda di Spaans Lagoen, na altura di e pier di Mangel Halto, tin un BHA (brazier) preto y un pasaporte benta riba caminda.
Mesora e patruyanan den becindario ta bay n’e sitio y enberdad nan ta topa cu e brazier y un pasaporte.

Ta trata di un pasaporte Colombiano cu ta pertenece na un dama Colombiana. E dama aki un rato prome tabata un di e victimanan di e atraco arma cu a tuma lugar na Rey Hing Bar & Restaurant. Aparentemente e atracadornan lo a tuma e caminda aki di Spaans Lagoen pa huy for di e sitio y pa un of otro motibo e BH y e pasaporte lo a cay of a wordo tira riba caminda. Polis a tuma e BH y e pasaporte pa mas investigacion.

Leave a Reply

Top