E historia di cambio di Statuut di Lotto pa Deporte

Den su veredicto relaciona cu e caso cu miembronan di Hunta di Supervision a cuminsa contra pais Aruba (Gobierno) ta wordo bisa cu Fundacion Lotto Pa Deporte ta un fundacion independiente cu ta bende loteria y ta reparti esaki bou di clubnan deportivo y otro institucionnan y actividadnan cu ta dirigi riba deporte.

Den e caso a bini dilanti cu pa algun aña caba ta discutiendo den FLPD pa haci algun cambio di ‘one tier model’ (unda cu esun cu tin di bisa den e fundacion ta e directiva, cu no tin ningun control interno) pa un modelo ‘two tier’ (den cual e directiva di e fundacion ta wordo nombra door y ta duna cuenta na un Hunta di Supervision, cu ta un organo den e Fundacion).

Corte ta bisa esaki basa riba e info cu a haya for di Oficina di Notario yarzagaray Bodeker & Partners cu a haya apoyo di Gobierno. Esaki a conduci cu a manda e cambio pa conseho cerca Directie Wetgeving & Juridische Zaken.

Despues di tur e procedura ey, den reunion di 28 di juli, 2017, e directiva e tempo ey di FLPD a dicidi pa formalisa e cambio di Statuut y esaki a sosode dia 17 di october di aña pasa.

E directiva a wordo nombra door di Minister como miembronan di Hunta di Supervision y Wernet a wordo nombra director. E Statuutnan bieu ta mustra cu algun di e miembronan e momento ey tabata na final di nan periodo.

Den e Statuutnan cu tabata valido te cu 17 di october, 2017 e directiva di FLPD ta wordo forma door di 3 te cu 5 miembro cu ta wordo apunta pa un periodo di 4 aña, cu e posibilidad di renombracion di un otro 4 aña.

Despues di cambio di Statuut e miembronan di Hunta di Supervision a wordo nombra door di Minister y nan ta sinta 4 aña, cu e posibilidad di wordo nombra b ek pa 4 aña mas. E directiva di FLPD ta wordo nombra door di e Hunta di Supervision (excepcion di e prome biaha: e miembronan ey a wordo nombra door di e Minister).

Corte ta sigui splica cu Minister tin e autoridad pa (bou di e Statuutnan bieu) pa retira e directiva. Den e Statuut nobo e por retira e miembronan, pero no e directiva; e autoridad ey ta den man di Hunta di Supervision.

E nombracionnan a wordo haci door di e Minister demisionario di deporte.
Dia 30 di november, 2017 e Minister nobo a pidi e directiva di FLPD pone nan funcion na disposicion di dje, cu e argumento “cu tin un Gobierno nobo”. Despues cu e miembronan a nenga di cumpli (y cu e Minister a bin haya sa di e cambionan den Statuut), den un decision di dia 3 di januari, 2018, e retira e miembronan cu e motivacion: continuidad y e bon funcionamento di FLPD; e cmabio di Gobierno y cu esaki ta bay man den man cu cambio di maneho di Minister; e autoridad cu e Minister tin pa retira e miembronan.

E retiro duna na Wernet a wordo hala aden door di e Minister.
Den decisionnan tuma dia 10 di januari, e Minister a nombra e miembronan nobo di Hunta di Supervision.

E mesun dia Corte a impone un medida di ordo pa evita cu e nombracionnan ey ta wordo inscribi den registro di Camara di Comercio.

Leave a Reply

Top