E tin 35 aña di servicio fiel y dedica na Hospital – Valerie Paula ta empleado di luna di december

Tur luna hospital ta anuncia su empleado di luna y e biaha aki a scoge Valerie Paula, secretaria di departamento di cuido Niet Snijdend 2. Coleganan di Valerie Paula a bini hunto y nan a sorprende como e empleado di luna. Hospital a regala Valerie Paula un weekend stay na Marriott Hotel y tambe un gift certificate di Aruba Vision Center.

 

Director Financiero, sr. Theo de Kool tambe tabata presente hunto cu e empleadonan di Niet Snijdend 2, kendenan tabata entusiasma pa celebra empleado di luna di December. El a gradici Valerie Paula pa su trabou cu e ta haci y empleadonan a scoge su persona como e ultimo empleado di aña. Tambe pa su añanan di servicio y e trato cu e ta duna tur hende cu ta yega cerca Valerie Paula.

 

Esther Mennen, Zorgmanager di Niet Snijdend 2, a duna di conoce cu a pidi henter e departamento pa nomina un empleado y aki a nomina Valerie Paula. Henter e team ta aprecia Valerie Paula pa su forma di traha y si un dia e no t’ey, e cosnan no ta bay manera e mannan magico di Valerie Paula. E ta hunga un rol importante pa ora un pashent ta bay cas of ta drenta hospital.

 

Valerie Paula tin 35 aña di servicio y su trayecto ta largo. El a cuminsa como cahera den cafetaria, unda el a traha pa 6 aña largo. Despues el a sigui como secretaria unda el a bay di 3er piso, despues bay piso 2 y te cu e fecha di awe e ta eynan. Tur cos tabata bay manual y despues a cuminsa pasa nan den computer. El a gradici su coleganan pa scoge como empleado di luna y hospital p’e regalo ricibi.

 

Valerie Paula ta un persona cu semper tin pasenshi y ta keda amabel cu hendenan na balie, unda e ta atende pashentnan, hendenan cu ta yega y e yamadanan. Semper e tin tur cos bou control y cosnan ta cana bon. E ta percura p’e pashentnan di OK haya nan cita cerca specialistanan, unda cu ta skirbi tur cos y nan ta haya un pakete di informacion. Tambe e ta wak tur cos riba e departamento, unda cu e ta drecha mayoria cos riba e piso. “Nos ta hopi contento cun’e, nos ta aprecia kico tur e ta haci”, asina Esther Mennen a duna di conoce. E team completo a haya cu nan mester a haci algo extra p’e.

 

E trabou diariamente di Valerie Paula ta traha cu file di pashent, trata cu nursenan y specialistanan. Pa su persona e sorpresa tabata algo inespera. Nan a yam’e pa un reunion di secretaria, y asina a sorprende. “E ta leuk, pasobra bo ta sinti cu bo ta aprecia y balora na trabou”, el a duna di conoce.

 

Top