ECO DMS a celebra 30 aña cu un gala espectacular

Wichita Villacres, Presidente y Directora Ehecutivo di ECO DMS y su ekipo dinamico di ECO DMS a conclui un aña intenso di actividad. Apesar di tur e trabaonan constante, e di 30 aniversario no por a keda sin wordo celebra, cu tres circulo importante cual t’e comunidad di Aruba, clientenan local como tambe internacional y empleadonan leal.

Mirando atras, segun Villacres, tabata un aña satisfactorio cu a culmina cu un invitacion pa 4 dia di evento, incluyendo tur e socionan internacional di e compania p’asina brinda pa 30 aña di colaboracion exitoso y tambe e pase di batuta di e Managing Director Maoreen Every, yiu muher di Villacres cu ta establece su mes como e futuro lider carismatico di e compania.

 

E evento final cu a tuma lugar den luna di december a wordo diseña pa impresiona tur e clientenan internacional di e compania y pa mustra cu Aruba ta un destinacion unico cu un variedad grandi di actividad.

Un gran cantidad di persona poderoso den e mercado di MICE a bin Aruba pa celebra cu ECO DMS, di 10 te cu 14 di december.

E ultimo dia di e programa, den presencia di Minister President Evelyn Wever Croes, Minister di Transporte Crispin Romero y Minister di Turismo Dangui Oduber, a tuma lugar un reconocimento den cuadro di e celebracion di e di 30 aniversario y tambe un celebracion di gala na Renaissance Convention Center.

 

E black-tie gala cual tema tabata: ‘A Caribbean Pearl Celebration’, a wordo poni den otro na un manera nechi, elegante y cu ta coresponde cu un celebracion di fin di aña. Den su discurso, e lider di e banda Jairo Boekhoudt a aplaudi Villacres pa su habilidad special pa reconoce y identifica e talentonan local, y tambe el a felicit’e p’e compania di alta calidad cu el a crea y cu ta capas di sirbi e bisitantenan exigente cu ta bishita nos isla.

 

Every a sorprende su mama cu un compilacion di videonan espontaneo cual protagonistanan tabata invitadonan cu a bira su amiga/onan pa bida, cu Villacres a conoce y crea un relacion atrabes di afiliacion profesional manera SITE & FICP, durante su biahenan pa promociona Aruba.

Palabranan di elogio y aprecio pa ECO DMS a bin di clientenan agradecido cu ta reconoce e rol fundamental cu Villacres tabatin den produci eventonan unico.

Loke mas a destaca e anochi aki tabata e presentacion di premionan cu Villacres y Every a entrega como muestra di aprecio na un lista estelar di mas di dos dozijn di dignatario di MICE, BI Worldwide conmemorando 27 aña di aliansa, Maritz Travel 25 aña, Prestige Global Meeting Source 25 aña y mucho mas y asina concluyendo decadanan di colaboracion.

 

Representantenan di companianan local tambe a subi escenario pa tuma nan premionan, incluyendo KukooKunuku Party Bus, Elite Productions, Sunny Ray Entertainment, Fofoti Tours & Transport, Action Tours, Pelican Watersports, Papiamento Restaurant, Hyatt Regency Aruba, Aruba Marriott Resort & Stellaris Casino, Marketing Plus NV, Renaissance Aruba Resort, The Ritz-Carlton Aruba y Hilton Aruba Caribbean Resort & Casino.

E aña di celebracion a termina cu un palabra di agradecimiento emocional di Villacres, kende a expresa su gratitud pa tur oportunidad cu el a haya na Aruba.

Leave a Reply

Top