Enbista di bòikòt venezolano: Minister Martina a deliberá ku empresarionan riba situashon

WILLEMSTAD- Minister di Desaroyo Ekonómiko dr. Martina a yama algun empresario pa partisipá na un deliberashon ku karakter di urgensia pa asina haña un bista di kon nan a keda afektá dor di e desishon resien di presidente Venezolano.

Representantenan di supermerkadonan, importadónan di fruta ku berdura, sektor di energia, komèrsio, zona franka, transporte, turismo, haf i aeropuerto a bin huntu pa deliberá i mobilisá.

“Venezuela ta asina serka, pues den un par di ora tin produktonan manera fruta, berdura i piská fresku riba merkado pa nos konsumo” asina un di e empresarionan importadó a trese dilanti.

Pa e motibu aki e desishon resién di e presidente Venezolano pa sera fronteranan tin efekto inmediato riba e fluho di produktonan for di e merkado ei.

E supermerkadonan a buska i ta buskando alternativanan riba merkadonan Dominikano i Colombiano “pero e problema ta e transporte ku ta dura muchu largu i si mester trese e produktonan ku avion esaki ta influensiá e preis di e produktonan”, asina e empresarionan a sigi bisa.

Minister Steven Martina a indiká di ke sinta ku tur importadó pa wak kon di un forma kolektivo por yega na un akuerdo pa  trese merkansía i asina mantene e gastunan bou di kòntròl.

Leave a Reply

Top