Ex empleado a spanta ex doño di trabou presentando cu cuchiu

Diadomingo atardi pa mas o menos 6’or y 35, polis ta detene un homber den e area di Hotzone na Palm Beach. Lo ta trata di un homber cu tabata traha na e establecimento +297.
Segun e gerencia di e establecimento, e persona tabata traha cu nan y diadomingo den oranan di mainta el a wordo kita for di trabou y den oranan di atardi, e la bolbe na su ex trabou cu dos cuchiu den su poder, y e gerencia di +297 lo a sintie intimida y mesora a pidi pa presencia di polis.
Na yegada e polisnan a bin topa e cabayero aki sinta na un otro establecimento un poco pabou di +297. Enberdad polis a haye cu dos cuchiu den su poder, mesora nan a detene y a transporte pa warda di polis, segun e cabayero e dos cuchiunan ta cuchiunan di e chef.
Aparentemente e homber aki diasabra anochi a wordo deteni na Sandbar, pa motibo cu e tabata bou influencia di un of otro substancia y tabata haci fastioso. Diadomingo atardi na momento cu e tabata bayendo bek +297, su auto lo a daña na altura di brug di madushi, el a lague atras y a cuminsa cana bay pabou. Varios persona a mir’e cu e dos cuchiunan y a avisa polis, pero nan no a topa cun’e, ta te ora cu nan a detene nan a bin compronde cu ta trata di e mesun persona.

Leave a Reply

Top