Exitoso 1st Annual ABBA Baseball Week a conta cu total di 303 participante

Weekend pasa, e federacion di baseball ABBA a inaugura e prome baseball week den historia di Aruba.

E inauguracion a conta cu presencia di Su Excelencia Gobernador, sr. Alfonso Boekhoudt, Presidente di Parlamento, sr. Ady Thijsen, Minister di Deporte, sr. Dangui Oduber, Parlamentarionan Sr. Alan Howell, Endy Croes, otro diferente dignitario y invitadonan den nos baseball local y internacional.

 

Durante e fin di siman cu a pasa, a tuma luga diferente clinicanan na Coaches, Umpires y Hungado di Baseball Arubano.

ABBA a hasi e participacion di e clinicanan gratuito p’e muchanan, pa asina tur mucha di Aruba, no ta importa den cua nivel socio-economico ta cay, haya chens pa experiencia algo asina.

Tur muchan cu a participa diabierna (dia 2) y diasabra (dia 3), a haya seminario di Ron Wolforth tocante con nos ta siña nos muchanan pa release un baseball y tambe con nos coaches mester guia y siña e muchanan con pa tira un bala adecuadamente, sin daña e mucha su brasa.

Esaki tambe lo hasi cu nos por crea pitchersnan den organisacionan cu tin actual, minimalisando lecionan na un edad hoben.

 

Ademas di Ron, Peter Caliendo tambe a duna seminario, di con nos coachnan por bira miho educador, kiko ta e filosofia di coaching pa mucha, con por hasi e muchanan mas atento durante wega y con por hasi e di e muchanan miho baseball players, cu tin como meta crea miho hendenan den comunidad ora nan ta grandi inculcando norma y balornan di calidad.

Tambe a siña coaches tecnica pa traha cu muchanan riba veld sin cu tin mester di grita nan of pone nan sinti malo.

 

Diasabra (dia 3), riba veld di Nadi Croes – Crismo Angela, tabata e highlight di e baseball week. E dia aki e evento a conta cu un total di 245 mucha den diferente categoria.

Partiendo e muchanan den categoria, e coachnan por a dedica y siña nan technica con pa tira un baseball n’e manera corecto, con pa crossover y gara un bala y hopi otro tecnicanan di baseball cu ta fundamental p’e muchanan sa pa asina nan bira un miho pelotero.

Octavio Dotel a traha cu outfieldersnan & Infieldersnan huntu cu Roderick Simon y Atilio Ambrocio, mientras cu Wilson Ramos a traha cu catchers.

Coach Roderick Simon, Ex Mets player, Atilio Ambrocio tambe a yudanan nos muchanan cu tecnicanan esencial.

 

Gill & Ron Wolforth y Sherwin Howell (Presidente di ABBA y ex-Pitcher estelar cu a gana den su tempo varios Pitchers awards y Rookie awards na por ehempel Haarlemse Honkball week, World Port Tournament) a traha cu nos muchanan chikito. E muchanan a siña tecnica corecto con y di ki manera bo ta uza bo brasa y dede pa tira bala debidamente como tambe otro tecnicanan importante den nan categoria.

Diadomingo e outdoor sessions a tuma luga cu Ron y Peter, caminda a hasi demonstracion na nos coachnan con nan mester siña e muchanan practica Baseball y pa asina e muchanan siña e deporte manera debe ser.

 

E umpires sigur no a keda afo.

Larry Young cu MLB Umpire Supervisor a duna seminario n’e Umpirenan y a siña nan e tecnica pa umpaya un 2-man System – 3-man system. Con ta e manera corecto pa busca un strikezone etc. Diadomingo Larry a duna demonstracion riba veld.

 

Na final di e clinicanan, e muchanan, coachnan y umpires di Aruba y Corsou a haya nan certificado den man di Presidente di ABBA.

E certificado p’e coachnan y umpirenan tin su balor como cu esaki ta certifica cu nan ta domina e materianan cu a wordo duna.

ABBA kier a pidi tur coach y umpire practica e tecnicanan pa hisa e nivel di baseball na Aruba.

 

ABBA kier a yama un danki tambe na Aruba su team nacional di AA cu a yuda tur e muchanan, como tambe coachnan riba veld.

Esaki sigur ta muestra di nan participacion den trabounan comunitario y asina duna muestra na nos muchanan cu nan t’ey pa nan.

Muchanan sigur ta siña dor di wak y sigur nan a wak mucha hombernan dedica y cu amor pa baseball.

 

Team Nacional di AA masha, pero masha danki!

Tambe un danki pa comision di evento ABBA y tambe tur e voluntarionan cu di un manera of otro a yuda hasi e actividad aki uno grandi.

Na nos sponsors: Subway, Fundacion Lotto pa Deporte, Quality Chiropractic, Manpower 4U, Holiday Inn, Ruben Garcia, Tropical Bottling Company, Kiwanis Palm Beach Aruba un Danki Inmenso.

 

Na nos prensa deportivo local cu a sa di duna realse na un actividad local: prome cu tur cos un danki special. Danki pa duna ABBA y tur su miembronan cu a participa e atencion cu nan merece. ABBA ta traha pa su miembronan y t’ey pa yuda eleva e nivel di baseball na Aruba y cu esaki nos kier a bisa cu ABBA Aruba Baseball Week t’ey pa keda!

Leave a Reply

Top