Funcionario halto di KPA manda cas

Ayera mainta hopi hende a wordo sorprendi cu e noticia cu Alto Mando di KPA a tuma e decision pa suspende un funcionario cu tin basta aña di servicio den Cuerpo Policial.

E informe ricibi ta indica cu e funcionario Errol Zebeda a haya prohibicion pa drenta tur edificio di Cuerpo Policial y Gobierno debi na un investigacion interno cu a wordo inicia. No solamente el a wordo prohibi entrada pero tambe el a wordo geschorst.

Errol Zebeda tabata ocupa e puesto di “ wnd. Hoofd Divisie Bedrijfsvoering” pa hopi tempo caba. Inclusive e tabata encarga entre otro cu adkisicion di autonan nobo pa Cuerpo Policial, a negocia contractonan hunto cu un comision.

El a yega Cuerpo Policial for di Surinam y a bini pa asistencia e miembronan di KPA den e aspecto social. Aki el a sigui desaroya su mes y a sigui un otro estudio na Universidad di Aruba.

AWEMainta a combersa cu un persona cu tabatin hopi aña den Cuerpo Policial y a yega di traha cu Zebeda. El a keda sorprendi cu e noticia aki. A wordo bisa cu den pasado Zebeda a yega di menciona cu tin cosnan cu no ta bayendo bon, den e parti financiero den algun seccion di KPA. Ki tin di berdad, investigacion lo mester bay demostra esaki.

Leave a Reply

Top