Futbolistanan a biaha diasabra pa haci “try-out” na Hulanda

E aña aki 4 futbolista di Arubaanse Voetbal Bond (AVB) a haya oportunidad pa bay haci un “try-out” na Hulanda cu e teamnan di Utrecht y Twente. Ta trata di e hungadonan Moises Castro, Kyle Budhu Lall y Xander Wouters di Britannia respectivamente y Ethan Tromp di Bubali. Diasabra anochi e hungadonan a biaha pa Hulanda, buscando oportunidad den futbol.

 

Martin Koopman, Director Tecnico y Bonds Coach di AVB y e federacion a scoge e hungadornan aki p’asina nan sera conoci cu futbol di Hulanda. Tur tin talento den futbol y mester ricibi e oportunidad pa demostra esaki, specialmente riba un nivel halto.

AVB a tuma e decision hunto cu e bonds coach pa laga esnan cu talento bay afo, manera a haci cu e 4 futbolistanan aki. Lo sigui haci esaki den e siguiente añanan, asina Martin Koopman a expresa.

 

Diasabra tabata un dia hopi agradabel p’e hobennan aki, kendenan lo keda na Hulanda te cu dia 14 di februari, unda dos hungador lo ta na Twente y otro dos na Utrecht. Awor nan ta haya oportunidad pa traha riba cierto area y nan lo por siña esey na Europa.

Pa aña largo a percura pa un bon relacion cu Koninklijke Nederlandse Voetbalbond (KNVB) y ta dunando su frutonan.

 

“Esaki ta un balor agrega, di cual mi a bisa cu nos mester haci algo pa hubentud”, asina e Director di Tecnico di AVB a indica. Awor cu tin e un bon relacion y acuerdo cu Utrecht y Twente, esaki ta brinda mas oportunidad pa nos futbolistanan.

Pa Martin Koopman crea e relacion cu Twente tabata algo facil, pasobra pa añanan el a hunga y tabata coach eynan. Haciendo esaki e kier mustra e talento di e hungadornan di Aruba den futbol.

 

Kyle Budhu Lall ta medio campista pa Britannia y e ta entusiasma p’e oportunidad cu el a ricibi. E ta contento di por bay Hulanda cu e otro 3 hungadornan, kendenan tambe a haya mesun oportunidad.

Kyle Budhu Lall lo bay haci su try-out na Utrecht y e ta kere p’e por logra un oportunidad na Utrecht, e mester ta liher cu e bala, pero tambe haci uzo di bon tecnica. Tambe pa scucha e coachnan riba tur loke ta importante.

El a gradici AVB p’e oportunidad, tambe Britannia y ASA, sin laga afo Martin Koopman pa regla tur cos.

 

Ethan Tromp t’e medio campista pa Bubali y ta contento p’e oportunidad aki. E prome cos cu Ethan Tromp a pensa ta cu si e haci su best, e ta haya su futuro pa hunga futbol profesional. P’e por logra na Hulanda e mester tin su disciplina, condicion y mester tende di nan.

 

Xander Wouters ta forma parti di e defensa di Britannia y su parti mas fuerte pa cosecha exito na Hulanda ta su mentalidad. E ta un futbolista cu semper ta duna di su mes 100% durante training y no tin miedo di otro hungadornan.

Un conseho cu el a duna hungadornan di LIFIDA ta pa tin disciplina, duna 100% y si perde e bala durante wega, keda cu cabes na halto y sigui bay. Tambe pa disfruta di e wega.

 

Moises Castro t’e medio campista pa Britannia y e lo haci su try-out na Twente. Durante su try-out e lo haci su maximo esfuerso. Loke ta mas importante pa tin t’e disciplina y e otro cosnan manera condicion lo train esaki.

 

Vice Presidente di AVB, Marlon Werleman tabata na Aeropuerto pa desea e futbolistanan un bon biahe y exito na Hulanda cu nan try-out. E momento cu e hungadornan a haya oportunidad pa bay haci e try-out na Hulanda ta un orguyo.

E ta un satisfaccion pa mira e inversion y trabounan haci. Ta henter e organisacion, e miembronan, por mira e logro aki, pasobra tin hungadornan cu ta demostra nan pasion pa futbol, cu a desplega esaki den e seleccion aña pasa na Orlando.

 

Por a mira cu Hulanda tin interes den e hungadornan aki y a invita nan pa participa pa mas cu 1 siman den un try-out tanto na Twente como Utrecht.

P’e mayornan ta un orguyo, p’e teamnan cu nan ta afilia, e coachnan cu a inverti hopi tempo den nan, pa mira con a progresa awendia.

Nan ta e talentonan di futbol y aki ta unda AVB ta hunga un rol importante pa duna e sosten y apoyo na futbolistanan ora haya tipo di invitacion pa haci try-out. Esaki ta refleha tambe cu nan compañero, otro hungador, muchanan cu ta practica futbol tur dia y haya oportunidad pa try-out, nan por conta cu AVB.

 

P’e parti financiero AVB ta para 100% tras di desaroyo y inversion den futuro. Ta papia di futuro cu ta muchanan di LIFIDA bin ariba, coachnan y AVB ta haci inversion pa sigui engrandece futbol na Aruba.

 

 

Leave a Reply

Top