Gezaghèber tòg kier introducí screening candidatonan pa Diputado Despues cu coalicion a rechasá mosion di MPB pa bin cu ‘screening’

Despues cu coalicion a rechasá mosion di MPB pa bin cu ‘screening’

 

KRALENDIJK – Den un carta dirigí n’e miembro di Conseho Insular sra. Maruga Janga cu copia p’e otro miembronan di e órgano aki, Gezaghèber Edison Rijna ta indicá cu el a buta e promé pasonan pa yega na formulacion di un concepto di protocòl tocante posibel sospecho di violacion di integridad di parti di un miembro di Conseho Insular òf un Diputado.

 

Gezaghèber Edison Rijna ta scirbi aserca cu e ta bay investigá si esaki por bay hunto cu un Declaracion Tocante Conducta, un asina yamá VOG, pa personanan cu ta carga autoridad político.

Esaki ta enserá tambe un profil di ‘screening’ pa tur personá cu ta aspirá pa bira representante di pueblo òf Diputado.

Pa por salbaguardiá integridad di potencial, representantenan di pueblo y Diputadonan mas mihor posibel mester scoge pa un profil di ‘screening’ den cua ta evaluá un grado halto di integridad.

 

E mensahe aki a bin djis algun dia despues cu fraccion di MPB den Conseho Insular pa medio di consehal Renata Domacassé a entregá un mosion den cua fraccion di MPB ta pidi pa instruí Gezaghèber pa implementá un proceso di análisis di riesgo di integridad pa tur persona cu kier bira Diputado.

Cu otro palabra, MPB su proposicion tabata pa introducí un tipo di ‘screening’ pa candidatonan pa bira Diputado.

 

E mosion no a pasa, pasobra coalicion consistiendo di Maritsa Silberie, Esther Bernabela y Shanoushka Raphaela di UPB sostené pa Robbie Beukenboom y Maruga Janga di PDB a vota contra.

Awor cu nan a ricibí e carta aki di Gezaghèber Edison Rijna, e miembronan di fraccion di MPB den Conseho Insular ta sumamente contento cu Gezaghèber si a mira e importancia y e necesidad di e proposicion di MPB.

 

Fraccion di MPB ta spera sinceramente cu canando e trayecto cu Gezaghèber tin intencion di implementá, ‘screening’ di candidatonan pa e.o. Diputado ta bira realidad, pasobra ‘screening’ di Diputado lo yuda cu Bon Gobernacion, pero tambe cu política nobo.

Esaki no solamente lo percura pa excluí personanan cu pa un òf otro motibo no ta den e posicion pa cumpli cu e exigencianan di un profil di ‘screening’ pa por ocupá un funcion gubernamental òf un funcion como mandatario, pero e medida nobo aki alabes lo ta un proteccion di e balor y e honor di e funcion riba su mes.

Leave a Reply

Top