Gobierno di AVP no tabatin placa pa traha na final di 2009? Nunca pueblo tin e honor di por gara sr. Mike Eman ta papia e berdad!

Pa di tantisimo bez partido MEP mester contradeci un mentira flagrante di e ex-Prome Minister fracasa Mike Eman, kende a declara recientemente cu: “Ora AVP a sinta no tabata tin placa pa traha”.
Ta increibel con un ex-mandatario por a goberna e pais aki durante 8 aña largo solamente basa riba mentira y manipulacion. Cu esaki ta comproba tambe cu e ta un persona cu sea ta perde haya of ta biba solamante di tira para y lansa mentira, segun MEP den un comunicado.

FONDONAN LAGA ATRAS NA 2009
Aparentemente sr. Eman ta come lubida ya cu na momento cu el a asumi gobernacion na final di 2009 y esaki basa meramente riba su mentira di campaña cu ‘from day one’ e lo elimina BBO, su Gobierno a ricibi un suma cuantioso den caha di Gobierno laga atras pa Gabinete Oduber:
Gabinete Mike Eman for di inicio a ricibi 250 miyon florin di e placa di Plant N.V. y cu e suma aki so el a pone un gran cantidad di compinchi cu AVP-diploma como coordinador cu salarionan astronomico, un gran cantidad di consehero y consultant cu tabata cobra tambe sumanan cuantioso, a derocha pagando biahenan di e Ministronan rond mundo, a paga pa e locura di e boto di Wubbo Ockels, conferencianan green, Al Gore, Richard Branson etc. Anto asina e kier bisa cu su Gobierno no tabatin placa pa traha na final di 2009?
Gabinete Mike Eman a ricibi den su prome aña di gobernacion un suma miyonario di BBO riba exportacion di Valero. Si, e mesun BBO cu Gobierno di MEP a introduci y pa cual Mike Eman a haci bochincha y kibra baricada dilanti di Bestuurskantoor. Esaki ta wordo comproba den e relato anual 2010 di Banco Central: “Most of the growth in tax revenue can be explained by the receipt of Af. 259.9 million associated with the tax settlement reached with Valero”.
Pues un suma di 260 miyon florin cu Mike Eman a haya den caha di Gobierno y p’asina e por a djo djo na su antoho. Anto ainda bo tin curashi pa bisa cu bo a haya e caha di gobierno bashi?
Gabinete Mike Eman a haya un suma di 190 miyon florin laga atras pa Gabinete Oduber den Fondo Desaroyo Arubano (FDA). Cu e suma aki Mike Eman por a traha entre otro e edificio di Cocolishi y tambe esun di DIMAS. Pues Mike Eman, placa bo tabata kier, placa bo a haya na cantidad!

Pues den e tres fondonan aki so Gabinete Mike Eman a haya 700 miyon florin, sin conta acerca tur locual nan a haya na BBO local y cu den 8 aña di nan gobernacion a yega na total di 650 miyon florin. Anto ainda esaki no tabata basta pa sr. Eman?

BONANZA FINANCIERO
Cu awe sr. Mike Eman te ainda ta papia con su Gobierno a duna reparatietoeslag, a aumenta bijstand y a duna schoolkinderentoeslag, tur e sumanan envolvi pa paga e toeslagen aki a bin grandemente di e fondonan cu e Gobierno di MEP a laga atras, describi den e 3 puntonan menciona mas ariba.
Pues Gabinete Mike Eman a cuminsa su gobernacion na final di 2009 den tur bonanza financiero, pero no a haya esaki suficiente y nan a cuminsa fia den forma nunca bisto un suma adicional di 2 biyon florin y pa cual nos futuro generacionnan lo mester paga esaki te cu aña 2039.

Y tur esaki sin conta acerca e debenan di e proyectonan PPP y pa cual e Gobierno actual mester bay paga 80.5 miyon florin pa aña y durante 25 aña largo.
Mike Eman, bo ta bay den e buki di historia di Aruba como e destructor di e pais aki, segun MEP.

Leave a Reply

Top