Homber kier a hole pia di un hoben

Diaranson ultimo a sosode un caso un poco straño y mester bisa cu danki Dios cu e hoben envolvi a dicidi di pone autoridadnan na altura di loke el a pasa aden.

Diaranson pa casi 2.30 di merdia ta presenta na Warda di Polis na Santa Cruz un hoben, kende ta bisa cu e tin di conta nan algo straño cu a pasa cune na momento cu e mester a bay scol

El a bisa cu e tabata para na e parada di bus na e caminda grandi dilanti Compleho Deportivo Libertador Betico Croes na Santa Cruz. E tabata sperando un lift pa bay scol. Dado momento un Nissan March blanco, cu su bumper patras ta daña, a para y a puntr’e si e kier un lift.

E homber a splik’e cu e ta bay tuma un ruta cortico, pasando via di Franse Pas, pa evita e trafico pisa. Na momento cu nan a drenta Franse Pas, e chauffeur a pidi’e pa kita su sapatonan. Segun e hoben a bisa e Polisnan, el a haya esaki un poco straño y no kier a kita su sapatonan. E homber despues a bise, hisa su pianan y e homber a gara su batata di pia. El a bisa e homber cu e no por hisa e pianan, pasobra e tin un lesion.

E hoben a dicidi di kita su sapatonan y a mira cu e homber a hole esaki y cu el a gusta esaki. E homber a hacie varios pregunta. Dado momento el a ripara cu e homber tabata filmando. Finalmente e homber a bah’e na su scol na San Nicolas.

E departamentonan necesario a wordo poni na altura y Polis tin atencion pa  e caso straño aki.

Leave a Reply

Top