Hopi aprecio y calor entre Mike Eman y coleganan politico Hulandes – “E reunionnan ta importante, pasobra e relacion cu Reino ta keda un prioridad grandi”

 

Segun Mike Eman

 

DEN HAAG- Ex Prome Minister di Aruba Mike Eman a reuni cu tanto Presidente di CDA sra. Peetoom como tambe Director di e Instituto Cientifico di CDA sr. Dijkman.  Ambos reunion a bay den un bon esfera y a yega na varios palabracion.

CDA y AVP ta partidonan ruman y asina mester mira e encuenteonan aki tambe. Despues di e reunionnan aki sr. Mike Eman a amplia riba loke a keda discuti entre partidonan.

 

Eman: “E reunionnan aki ta importante pasobra e relacionnan cu Reino ta keda un prioridad grandi. Pa stabilidad di nos islanan tin factornan sumamente importante cu ta wordo garantisa dor di nos relacionnan den Reino.

Stabilidad, integridad teritorial, nacionalidad ta factornan importante pa Aruba cu ta keda ancra den nos relacionan constitucional dentro di Reino.

Tambe nos seguridad legal ta worde garantisa te na Hoge Raad.

 

Otro factor comun cu nos tin den Reino t’e relacionnan exterior, cu Embahadornan rond mundo, loke ta hopi importante. Mescos tambe nos nacionalidad Hulandes/Europeo cu ta duna nos aceso tur rond di mundo.”

“Durante y hasta prome di nos gobernacion, den Parlamento tambe, nos a pone hopi enfasis riba e relacionnan den Reino enfocando cu mester busca e camindanan unda por demostra cu nos tin un beneficio mutuo pa tanto e parti Caribense como e parti Europeo di Reino.”

 

Mike Eman a splica cu esaki ta banda di e parti constitucional cu tin ancra den nos Statuut cu tur e garantianan cu Statuut te brinda ta obvio cu den e epoca moderno aki y cu e cambionan cu tin ta necesario pa poblacion di tur dos parti di Reino por mira e relacion den un contexto di beneficio mutuo.

“Eynan ta unda nos a traha hopi duro dor di trece TNO Aruba, trece KLM bek, inverti den proyectonan conhunto cu Schipol caminda a desaroya tecnologianan nobo pa maneha entrada y salida di pasahero, nos a trece otro partnernan tambe manera Scheepvaartschool Rotterdam, Qredits, Port Amsterdam, Philips cu cual a logra haci e conversionnan di luznan convencional pa LED, sigur den edificionan di Gobierno.

Aki Philips por a presenta su mes tambe riba plataforma internacional.”

 

Mike Eman ta invatisa cu si bo kere den Reino, ta importante tambe pa busca oportunidadnan den Union Europeo. Esaki ta algo cu partido CDA tambe ta kere aden y a demostra esaki durante añanan.

Eman: “Banda di tin un ideologia comun entre CDA y AVP nos tin un pensamento comun tambe cu hunto nos por duna un mihor contenido na Reino y probecha di e relacionnan cu Union Europeo.

 

Esey ta loke mi a combersa cu Presidente di CDA sra. Peetoom y cu Director nobo di e instituto cientifico di CDA Dijkman. Nos ta bay reflexiona unda tin oportunidadnan pa nos sigui traha hunto, unda tin oportunidadnan nobo pa nos enfoca riba nan y cana hunto riba cierto tarimanan Europeo.

Nos a keda satisfecho cu e reunion di awe cu e pensamento cu nos tin caminda pa cana y traha hunto riba tema y retonan nobo.

2019 Ta aña di eleccion pa Parlamento Europeo y ey tin oportunidadnan grandi pa duna un contribucion como partido AVP na CDA. Tur esaki nos a discuti durante e reunion y ta hopi contento con nos a yega na palabracionnan importante pa reinforsa e relacionnan di modernisacion di partido AVP hunto cu Fundacion Mito Croes y Fundacion Digna Lacle-Herrera y e Instituto Cientifico di CDA.

 

Riba tarimanan internacional nos a yega na comprendimento unda tin oportunidadnan hopi grandi pa por traha hunto. Den un futuro cercano nos lo presenta  plan y ideanan cu nos a discuti y acorda awe.”

Eman tin varios encuentro mas na Hulanda unda e ta worde ricibi cu hopi admiracion y aprecio, mirando e esfuersonan grandi cu el a hinca den e relacionnan cu Reino y tambe cu Union Europeo durante su gobernacion y carera politico.

 

 

 

Top