Hopi puito saliendo di caso Marko Espinoza, Ilegal a wordo priminti permiso si e duna declaracion perhudicial contra Espinoza

Den e noticiero awe merdia di Nelson Speed Andrade, el a papia ampliamente riba e casonan cu ta muestra di dictadura tumando luga na Aruba, desde cu un Gobierno nobo a sinta.

E comentarionan cu por a scucha ultimo dianan tabata “e miedo cu nos tabatin cu si MEP bini den Gobierno a bira realidad. E persecucionnan politico a cuminsa”.

E prome tabata momento cu Andrade, cu a haci un reportahe den sala di Parlamento na unda e Presidente ta sinta, cu a haya un carta prohibiend’e pa drenta e edificio pa 3 luna. Den e mesun periodo a aresta Marko Espinoza, kende no ta e persona responsabel pa ekiponan di Gobierno, pa materialnan di Gobierno cu a disparce.

Den e programa (noticiero)  a wordo bisa cu a manda yama testigo(un ilegal) pa e wordo interoga den Bestuurskantoor, y a activa “piket” (cu normalmente
ta pa casonan serio) pa esaki sosode.

Pues, segun nan a bisa, chauffeur di Minister Otmar Oduber (kende ta un Polis) a bay busca e ilegal aki cu auto di e Minister pa hib’e Bestuurskantoor. Eyden el a wordo interoga door di Recherchenan di piket, kendenan a haya ordo pa presenta na e sitio.

A base di interogacion aki, a detene e hoben Petrochi den oranan laat di anochi.

Loke tabata monstruoso den e caso aki ta e informacion cu a wordo poni den e Procesverbaal door di e Recherchenan ta cu e ilegal a bisa “cu nan a priminti cu nan lo dunami permiso si mi duna un declaracion”.

Nan a acusa Minister Otmar Oduber, como esun cu a manda busca e ilegal pa duna declaracion, y Prome Minister Wever Croes, kende ta esun cu a yama Procurador General y Comisario Trudy Hassell pa haci e detencion.
E keho mes a wordo entrega despues cu e interogacion a tuma luga, nan a bisa den e noticiero di merdia na Canal 90.

Top