Hopi uzo di alcohol den fin di siman

Tur fin di siman ta e mesun storia. Un cantidad grandi di casonan cu Polis mester brinda asistencia pa personanan cu ta sali keiro, abusa di e alcohol y sinta tras di stuur of busca pelea. Esaki ta tanto hende homber como hende muhe.

Diasabra Polisnan a wordo manda den Lopezstraat pa un homber cu tabata cana sunu riba caya. Na yegada a topa cune pero den jockey y cu machete den man. Tur su resto di paña tabata tira riba caminda. E tabata mustra hopi bou influencia di alcohol of otro substancia. A trata di papia cune pero sin resultado. Esaki tabata den oranan di merdia y a hibe warda unda el a haya un cuarto gratis.

Diasabra tambe pa 6’or di mainta Polisnan ta wordo para na Seroe Colorado door di un homber R (26 aña), kende ta bisa cu dos homber a trece eynan y a horte. Polisnan a sinti cu RAS tabata hole stinki di alcohol y a hibe warda di San Nicolas. Na warda el a bisa cu el a laga su auto staciona den binnenstad, un Nissan Almerea. Berdad polisnan a haya e auto, dilanti entrada di CITGO Pompstation, porta habri, cu wielnan dilanti y patras kibra. Den e auto a haya boshi yabi y 600 florin,. A bisa cu ora e ta bon na tino, e por pasa warda pa duna keho.

Despues di mey anochi Polisnan a wordo manda banda di Crystal Casino pa un pelea. Nan ta topa cu un homber, di inicial U. El a bisa cu el a wordo maltrata door di dos amigo kendenan despues a core bay. E tambe tabata basta bou influencia di alcohol. A bahe na su cas na Plata y a bise cu dialuna e por entrega keho, si e ta desea esey.

Esaki ta apenas algun di e tantisimo casonan cu ta demostra e uzo y abuso di alcohol ta un problema grandi na Aruba.

Leave a Reply

Top