Hues a rabia cu acusado a gañ’e

Diaranson den oranan di merdia tabatin tratamento di un otro caso penal pa posesion di arma. Esaki tabata contra e homber I. Dickens di 22 aña, procedente di Corsou. E acusado aki tabata mustra asina trankil, mustrando cu e no ta asina malo manera e ta wordo pinta, te ora cu Fiscal a saca e berdad dilanti. E Hues a tum’e masha na malo cu el a gañe cu ta un biaha so e tabata envolvi cu husticia.

Dickens a wordo acusa di posesion di arma di candela den luna di di juni, 2017.

“E arma no ta dimi señora,” e acusado a cuminsa bisa. “Mi tabata burachi y paranoid. Mi no tabata sa kico mi ta haci. Mi a haya e arma y ora cu mi a mira Polis mi no tabata sa kico pa haci,” e acusado a bisa na momento cu Hues a puntr’e di con e no a bati alarma cu el a haya un arma di candela.

E procesverbaal ta bisa cu e patruya tabata pasando na Eagle Beach, ora cu nan a mira cu e homber aki a bira nervioso, y tabata blo coba den un tas y bira lomba pa nan. Na momento cu nan a pidi’e pa mira den e tas, a mira un cabez di un arma di candela.

E acusado a bisa cu el a bin vakantie pa dos siman y tabata cu algun amigo na lama, ora cu el a haya e arma di candela y a hinke den su tas.

Hues a puntr’e si e bay Corsou bek, e lo por haya su trabou. El a splica cu e tabata traha cu su omo y e ta kere cu e por haya su trabou bek, aunke cu su famia ta rabia cun’e. Pero tambe el a bisa cu el a yega di wordo condena un biaha den un caso di asalto,  pero pa complicidad, “Nan a bisa cu mi tabata envolvi den e atraco pero no ta berdad. Mi a wordo condena solamente pasobra mi tabata sa di e caso,” el a bisa Hues.

E momento ey Fiscal a presenta un documento, cu e Magistrado no tabatin conocemento di dje. Na dos ocasion, tanto na 2012 como na 2014, el a wordo condena pa posesion di arma. KI bo tin di bisa di esaki, e Hues cu un cara serio a puntre. El a contesta “no esaki tabata pasobra di e mesun caso cu mi a bisa nan a envolvi mi den dje. Como cu den e caso ey nan a uza arma, nan a tira esaki tambe riba mi.”

Fiscal den su rekisitorio a trece dilanti cu nan ta haya hopi straño cu sin mas e acusado aki ta haya un arma di candela banda di lama. Straño tambe cu un persona ta tira un arma di candela, cu bal basta placa, afo.  Un arma asina ta bal mas cu 1000 florin.

Fiscal a bisa e hecho cu e ta bisa cu e arma no ta di dje y cu el a ha’ye banda di beach no ta haci diferencia den seriedad di e caso aki. “Bo tabata riba caminda publico, canando cu un arma carga cu ta algo peligroso pa bida. Ora bo ta cana cu un arma sea ta pa menasa of tira un persona,” el a bisa e acusado. Ademas, no ta prome biaha cu e homber aki ta wordo condena pa posesion di arma di candela.  Pesey el a pidi 18 luna incondicional.

Hues mesora a bisa e acusado cu el a haya e acusacion proba. “Simplemente bo no mag tin arma. Cu bo a haya e arma, mi no ta kere esey. Mi ta tene na cuenta cu bo a bay dos biaha sera caba pa posesion di arma. Mi no tin motibo pa desvia di e demanda di fiscal y mi ta dunabo 18 luna.”

E acusado a bandona sala rabia.

Top