Ladron a bay cu flatscreen di 55 inch di scol pero a lague na caminda

Diabierna ultimo den oranan di madruga presencia di Polis ta wordo pidi pa un adres na Savaneta relaciona cu un caso di kiebro y robo y cu ladronnan lo ta den e caso aki ainda.

Esaki a sosode na un cas banda di Colegio Sagrado Curason.

E patruya cu a bay na e sitio a core rond di scol, y na e momentonan ey nan ta haya informacion cu algun persona a mira tres mucha homber crusa caminda grandi. Personanan den bisindario di Ritz  a bisa cu e mucha hombernan aki a bini for di direccion di e scol. Na momento cu nan a mira polis, nan a dicidi di crusa caya y a cuminsa core, segun e hendenan a conta.

Dos patruya a coy direccion indica door di e testigonan pero no a topa cu e mucha hombernan. Na e momento ey a drenta melding cu tin un auto staciona dilanti e scol ariba menciona y e patruyanan a bay controla e situacion.

Nan a papia cu e cabesante di scol, kende a declara cu rond di 3.36 di madruga el a haya yamada di e compania di siguridad pa avise cu e alarma di e scol a bay “on”. Hunto a drenta paden pa controla e situacion. A bin constata cu e desconocinan a destrui e bentana di klas 5-A pa drenta paden. Nan a pasa den diferente klas lokaal y for di e leslokaal di 6de nan a bay cu un television marca L.G. di 55 inch

Otro informacion cu Polis a ricibi ta cu tur tres e mucha hombernan tabatin jacket bisti, color scur y dos tabatin dread locks (un di nan tabatin un muts blanco bisti y un di e mucha hombernan cu dreadlocks aparentemente tabatin un arma di candela den su man.

Tur dos patruya a keda controla den bisindario. Un di e patruyanan a bin topa cu e television dilanti un cas den Mgr. Ellisstraat. E television a wordo transporta pa warda di polis y autoridadnan concerni a wordo poni na altura di easki.

Leave a Reply

Top