Landamento sincronisa cu dos dia di competencia celebrando Dia di Betico

Tanto diahuebs 25 di januari Dia di Betico como tambe e diasabra 27 di januari, landamento sincronisa lo organisa nan competencia pa y tur nan atletanan. Mester bisa cu dia 25 di januari e competencia ta riba “Figures”, mientras e diasabra 27 di januari esaki lo ta riba rutina. Pa ambos dia e competencia ta programa  pa cuminsa 9or di mainta den Pool Olimpico Roly Bisslik na Savaneta. E deporte di landamento sincronisa ta trahando riba talentonan nobo den nan deporte y ya caba por a wak e bon fruto di e trabou eherce. E anja 2017 sigur tabata un bon anja pae atletanan di landamento sincronisa unda e atletanan Neftaly Albertsz y Abigail de Veer a competi den e US Nationals na Arizona, mientras Kyra Hoevertsz y Shelby Kasse a logra gana medaya di Brons pa Aruba den e duet free na Argentina. Tambe e seleccion di landamento sincronisa a competi den e UANA/Panamerican Synchronized Swimming Championships na Santiago de Chile. E atleta Kyra Hoevertsz a logra medaya di Bronz den e Solo Free Senior den e UANA Panamerican Championship.

 

Un danki sigur na Lotto, e Loteria di Aruba pa medio di Stichting Sportsubsidie Aruba cu a subsidia e eventonan deportivo enconexion cu e celebracion riba Dia di Betico. Tur aña mayoria federacion tin riba nan calendario un evento deportivo riba 25 di januari, celebrando asina e fecha natal di e gran estadistica Arubano.

 

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.

 

 

 

 

 

Top