Lilli Prince di KWF – Cancer ta alarmante na Aruba

Durante un conferencia di prensa pa anuncia un evento cu ta bay tuma luga, Lilli Prince, di KWF a expresa su preocupacion pa e cantidad grandi di casonan di cancer na Aruba.

El a bisa cu e cancer cu ta keda resalta y domina na Aruba ta cancer di pecho. Pero el a bisa mesun momento cu tin hopi caso di cancer cu nan no ta altura di dje pasobra e hendenan (pashentnan of famia) no ta acudi na e oficina di Koningin Wilhelmina Fonds. Solamente sa di casonan ora cu mester biaha y mester di e ayudo pa e di dos compañante di e pashent di KWF ta yuda cubri.

E situacion di cancer, el a bisa, ta birando alarmante si mira cuanto hende hoben ta fayece a causa di cancer. Esaki ta e casonan cu hopi biaha e fundacion no ta na altura di dje pa por brinda e ayudo e.o. di guia pa e pashent y e famia. Pesey ta bon p’asina cu un pashent haya sa cu e tin cancer, sea e of un familiar acudi na KWF pa registra esaki pa nan haya e guia necesario tambe. Asina tin hopi hoben cu cancer den exterior cu e fundacion no ta na altura di dje.

Ta bon pa registra na KWF, pasobra ora cu e momento di pidi ayudo p.e. di pasashi, no ta bay perde tempo haci investigacion pasobra tur cos ta den nan man caba. Aworaki e cantidad di casonan existente cu nan tin registra ta 400, y ultimo tempo a haya nan mes cu hopi caso di hobennan y hende grandi na momento cu nan acudi pa busca un protesis.

Cancer di cuero tambe ta uno alarma, cu ta debi na e solo fuerte cu tin na Aruba. Pesey nan ta conseha mayornan pa cuida e muchanan for di un edad hoben.

Mirando e aumento di casonan di cancer en general, KWF ta bay organisa algun charla cu specialistanan y asina lo haya e datonan real di cancer na Aruba. Tambe nan lo haya sa cual ta e cancernan cu mas ta domina na Aruba. Aworaki ta tende hopi manera, cancer di tripa y pancreas, pero cu dato di specialistanan so por bisa cu siguransa. KWF no tin e estadisticanan di e cancernan cu ta domina. Solamente nan tin di esnan di cancer di pecho cu ta acudi na oficina di nan fundacion.

Tin dos otro fundacion mas cu ta funciona mescos cu nan riba e tereno aki cu ta Fundacion pa Cancer di Prostaat y Fundacion di Cancer di Tripa. Nan lo bay traha cu nan sigur pa intercambia informacion y ya caba ta trahando cu e fundacionnan BOB y Mary Joan Foundation.

Datonan di e tema aki AWEMainta a constata ta dificil pa haya. E ultimo rapport di Salud ta data di 2013 (publicacion) pero e cifranan ta di 2007 pa 2010. Den e periodo ey e tipo di cancer no. 1 tabata cancer di cuero (pa ambos sexo), cu un total di 611 caso nobo raporta den e periodo ariba menciona. Di e cifra ey, 12 caso tabata maligno, 5 hende homber y 7 hende muhe. Den e mesun periodo ey tabatin un total di 832 caso nobo di cancer registra di cual 54.8% ta hende muhe (entre 15 y 59 aña) y 45.2% hende homber (entre 60 y 74 aña).  Pa ambos sexo e tipo di cancer cu mas pa prevalece den e casonan nobo ta cancer di pech cu 212  caso nobo.

 

Leave a Reply

Top