Lotto a felicita atleta – Chiara Petrocchi kende a logra medaya di Brons na Las Vegas, Nevada

Aruba su deporte un bes mas a saca cara den exterior cu e atleta femenino y alabes prospecto grandi den e deporte di taekwondo, esta Chiara Petrocchi kende a bolbe subi podium pa Aruba den exterior.

Den un di e campeonatonan mas grandi di taekwondo teni na Merca, e hoben Arubano ta logra yega te den e ultimo 4 atletanan cu a lucha pa medaya den e famoso US Open di Taekwondo na Las Vegas, Nevada.

 

Despues di a gana su tres prome peleanan contra respectivo Merca dos biaha y Canada, Chiara Petrocchi a topa un otro fuerte contrincante di Merca unda el a perde e bataya y asina keda cu e medaya di Brons.

No obstante di e medaya di Brons, Chiara por mira tras di un tremendo torneo unda el a obtene un otro medaya pa Aruba.

Aña pasa den e mesun US Open aki, Chiara Petrocchi a gana medaya di Plata y aña aki a logra medaya di Brons.

 

Ainda ta fresco den nos memoria unda aña pasa srta. Petrocchi ta logra triunfa cu un medaya di Oro pa Aruba den e Weganan Sur Americano Hubenil na Santiago den Chile.

Lotto, e loteria di deporte semper ta kere den nos atletanan local y ta p’e motibo aki tambe ta sostene cada un den e mihor forma posibel, sigur pa cu nan preparacion, fogeo y competencianan local y internacional.

Pabien Chiara Petrocchi, Aruba ta super orguyoso dibo un biaha mas!!!

Leave a Reply

Top