Lotto ta felicita Amateur Baseball Bond Aruba cu nan exitoso 1st Annual ABBA Baseball Week 2017

Diahuebs anochi tabata un dia historico pa deporte di baseball na Aruba ora Amateur Baseball Bond Aruba a inaugura e prome edicion di e ABBA Baseball Week den e ballroom di Holyday Inn dilanti di dignitario y invitadonan di honor.

Presidente di ABBA, sr. Sherwin Howell a hiba palabra unda el a bisa cu e proyecto aki a hiba mas cu un aña di planificacion y preparacion intenso p’asina ofrece un siman di curso di nivel mundial y cu personanan capacita for di exterior.

 

E inauguracion di e ABBA Baseball Week a wordo inaugura pa mandatario di deporte, sr. Dangui Oduber den presencia di Gobernador, sr. Alfonso Boekhoudt y Presidente di Parlamento, mr. Ady Thijsen.

Mester bisa cu for di exterior bin algun persona masha conoci den mundo di baseball na Merca principalmente den Mayor League Baseball.

Durante fin di siman a duna clinica na umpire, coaches y na nos muchanan como tambe charla na nos coach y umpire nan.

Esakinan a tuma lugar na tereno di Nadi Croes/Crismo Angela na Sta Cruz y den e sala di Piedra Plat Entertainment Center.

 

E anochi aki ABBA a duna reconocimento n’e aporte di St. Fundacion Lotto Pa Deporte. Sr. Di-Stefano Wernet, Director di Lotto, a ricibi un award.

Tambe sr. Tito de Cuba, Presidente di Hunta di Supervision di St. Fundacion Sportsubsidie Aruba, a haya un award pa nan sosten na de deporte baseball.

E federacion di ABBA por mira tras di un evento sumamente exitoso cu sigur lo trece su beneficionan pa tanto nos pelotero, coach y umpirenan.

No tin duda cu seminarionan aki lo yuda e desaroyo di nos baseball unda nos por dal un stap grandi pa e proximo nivel, un nivel mas halto.

 

P’e proximo aña, ABBA por spera sigur e apoyo di St. Fundacion Lotto pa Deporte cu ta sostene proyectonan cu ta na bienestar di tur cu ta traha pa deporte en general, aki por pensa riba atleta, dirigente, coach, umpirenan, ect, ect.  Lotto cambiando bida di nos deporte na Aruba.

Leave a Reply

Top