Luis Riu a presenta dilanti Corte boluntariamente; Acusacion contra ehecutivonan di Riu Hotels & Resorts ta infunda

Nos ehecutivonan ta absolutamente inocente p’e cargonan cu tin contra nan. Riu Hotels & Resort ta confia den e sistema hudicial di Merca y cu sin duda na final nan lo conclui cu e acusacionnan aki ta totalmente infunda y cu e ehecutivonan ta desea ansiosamente di demostra nan inocencia.
Luis Riu a biaha desde Spaña pa asina boluntariamente presenta dialuna dilanti Corte na Merca, unda a presenta e cargonan, manera a keda acorda y coordina cu e autoridadnan local. Ta parti di e procedemento normal, cu ta presenta e acusacionnan dilanti e acusado en persona den Corte, manera a nota riba e publicacionnan publica na Merca.
E procedemento completo tabata cuestion di algun ora y Hues no a nenga di duna permiso pa biaha mesora. Ambos ehecutivo por sigui bishita diferente destino internacional libremente unda e hotelnan di Riu ta opera. Desde awe, Luis Riu ta sigui cu su actividadnan normal.
Famia Riu a funda Riu Hotels & Resorts como un hotel chikito na aña 1953, na Majorca, Spaña. Awendia RIU, cu ta partner cu TUI, e compania di tours mas grandi na mundo, ta ofrece 95 hotel, di cual riba 70% ta ofrece acomodacion “All Inclusive”. Riu Hotels & Resorts ta bou maneho diario di e di tres generacion di famia Riu, cu su oficina principal na Majorca y ta conta cu riba 26 mil empleado y ta estableci den 19 pais, manera Spaña, Portugal, Irlanda, Alemania, Bulgaria, Turkia, Morocco, Merca, Mexico, Jamaica, Bahamas, Aruba, Costa Rica, Republica Dominicana, Panama, Cabo Verde, Mauritius, St. Martin y Sri Lanka.
Aki na Aruba, Riu Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 25 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.

Leave a Reply

Top