MEP lo a elimina ‘hedging’ pero ta aproba otro contract di ‘hedging’ Mescos cu debe nacional

Eliminacion di e contract di ‘hedging’ pa asina baha prijs di awa y coriente tabata parti esencial di e campaña politico cu politiconan di MEP  kendenan awe ta Minister, a trata di convence pueblo pa gana confiansa.

Fraccion di AVP diabierna ultimo a tuma nota cu na luga di cumpli cu promesanan haci na pueblo durante di campaña, gobierno di Evelyne Wever Croes ta haci net lo contrario ya cu gobierno a bay di acuerdo pa gerencia di WEB Aruba NV, firma otro acuerdo di hedging.

Na mes momento por a tuma nota tambe cu ningun caminda gobierno POR-MEP-RED ta haci participacion cu prijs di coriente y awa ta baha, pues dos promesa den uno, no a cumpli cu ningun di dos.

Varios candidato di MEP, entre otro sigur e actual Minister Glenbert Croes, durante di reunionnan publico di Parlamento y tambe durante di conferencianan di prensa, a sigura pueblo cu ora cu su partido drenta den gobierno, lo bay over na elimina hedging y cu lo percura pa baha prijs di awa y coriente.

Sinembargo e forma di procede aki no ta algo nobo di partido MEP ya cu den pasado e ex lider Nelson Oduber a yega di confirma cu pa su partido geel, “campaña ta un cos y gobernacion ta otro cos” y ta loke semper e partido MEP a haci tambe.

Ya caba pueblo a ripara cu ni palabra di e Prome Minister y lider di MEP tin base pa pueblo kere den esaki, sigur ora cu Evelyne a priminti pueblo cu su gobierno lo bay bek na 7 minister y a awor ta bin resulta cu nan tin 8 mas uno di carambola cu ta totalisa 9 Minister.

Hasta e lider di MEP y Prome Minister a pone esaki como condicion pa partidonan cu lo kier a forma parti di un gobierno di coalicion cu su partido pero despues a guli su palabranan manda abou.

Otro promesa clave cu partido MEP a haci durante di campaña ta di drenta gobierno  y elimina Aruparking pero aparentemente e Prome Minister real di e gobierno, lo a stroba e proceso aki y awor a pone henter e asunto aki den man di un comision.

 

Otro ehempel cla di falta di seriedad y respet pa cu pueblo di Aruba, ta e hecho cu pa mas cu 6 aña largo, politiconan di MEP a sigura pueblo cu e pais ta bancarota,  y cu gobierno di AVP a crece e debe nacional di e pais.

Awor den un intento desespera pa yega na pone un presupuesto aceptabel den otro, Minister Xiomara Ruiz Maduro, un di esunnan cu den Parlamento semper a papia di debe pa nos yiunan, pa nos nieto- y bisa nietonan, ta papia awo di bay busca placa pa cubri deficit den e presupuesto di gobierno POR-MEP-RED, ya cu pa falta di a traha serio 8 aña largo, awor no tin nocion con pa hinca e presupuesto den otro.

Awor si ta bon pa bay pa sigui haci debe, sin busca placa ya cu awor esey tin un otro nificacion pa MEP y no ta importante pa e partido geel, cu nan ta manipula pueblo di e forma cu nan a bin ta haciendo esaki.

Fraccion di AVP lo sigui vigila e desaroyonan aki y sigui informa pueblo di e manipulacion grandi cu MEP a bin ta haciendo den oposicion pero cu ta sigui awor tambe den gobernacion.

 

 

 

Leave a Reply

Top