Minister Besaril cu bishita oficial na Hogeschool van Arnhem en Nijmegen y studiantenan di “HAN Huntu”

Diaranson dia 7 di februari ultimo Minister Plenipotenciario na Hulanda Guillfred Besaril a haci un bishita oficial na Hogeschool van Arnhem en Nijmegen unda cu e mandatario a topa cu diferente dirigente di e instituto como tambe cu algun di nos studiantenan di Aruba. HAN ta un di e institutonan riba nivel di HBO cu un di e populacionan di mas grandi di studiantenan di Aruba. E meta principal di e bishita tabata pa cera conoci di cerca cu e iniciativa “HAN Huntu” cu ta un proyecto special di HAN pa sostene nos studiantenan di Aruba y di e demas islanan di Caribe Hulandes. Durante di e bishita aki Minister Besaril a wordo acompaña pa directeur a.i. di Arubahuis mr. Glenn Ling, Peter Auwerda di Ministerio di Enseñansa, Ciencia y Desaroyo Sostenibel di Aruba y un delegacion consistiendo di entre otro persvoorlichter di Arubahuis, coördinator di Afdeling Onderwijszaken di Arubahuis y mentor di Arubahuis pa e region di Gelderland.
E delegacion a wordo ricibi pa drs Jetty Schaap, miembro di Management Team di HAN y tambe door di diferente docente cu ta envolvi cu e iniciativa HAN Huntu y cu e oficina di asuntonan internacional. HAN a traha un programa extenso y interesante pa Minister Besaril y e delegacion di Aruba. Durante di e bishita a hiba combersacion riba nivel di maneho unda Arubahuis y Ministerio di Enseñansa di Aruba hunto cu e instituto lo por coopera y sostene otro mas pa asina nos studiantenan por ta aun mas exitoso.

Tambe durante di e bishita Jacqueline Marti, hoofddocent na HAN y Arubiano, a duna un presentacion interesante titula “Onderzoeksresultaten Caribisch Nederlandse studenten” riba un investigacion interno cu e docente a conduci riba e factornan di riesgo y exito pa cu estudio specificamente pa studiantenan di Aruba y e demas islanan. Despues di e presentacion Minister Besaril a invita señora Marti pa comparti tambe e resultadonan di su investigacion cu e demas mentornan di Arubahuis pa asina por intercambia di informacion y idea pa con nos por mehora e guia y sosten na nos studiantenan na Hulanda y esnan cu tin ambicion pa bin Hulanda pa studia.
Finalmente e delegacion a haya e oportunidad pa topa cu e studiantenan di Aruba cu ta envolvi cu e Proyecto HAN Huntu. E encuentro cu e studiantenan tabata uno hopi ameno y positivo unda cu e studiantenan a ilustra kico tur HAN Huntu ta haci pa nos studiantenan di Aruba. Nan a splica di e ‘buddy systeem” cu nan a implementa unda studiantenan mas avansa ta sostene y conseha e studiantenan nobo. Tambe a duna ehempelnan di workshops y actividadnan cu HAN Huntu ta organisa specialmente pa nos studiantenan a base di nan necesidad y interes. Minister Besaril y e delegacion tabata sumamente impresiona cu e envolvimento di nos studiantenan y a aplaudi HAN y e studiantenan pa cu e iniciativa aki. E delegacion di Aruba tambe a probecha di e oportunidad pa laga e studiantenan duna nan feedback y recomendacionnan pa con Aruba y Arubahuis lo por mehora e servicio y sosten na nos studiantenan. Un di e puntonan principal cu a bin dilanti ta e falta di miho guia y preparacion na Aruba unabez e studiante kier tuma e paso pa bin studia na Hulanda. Minister Besaril a gracidi e studiantenan pa e input aki y a indica cu Arubahuis lo bai tuma un rol hopi mas proactivo y prominente tambe pa cu e preparacion y informacion na nos studiantenan cu kier bin studia na Hulanda. Minister Besaril a elogia e studiantenan y tambe HAN y especialmente sra. Ank Greijmans, projectleider di HAN Huntu, pa tur e esfuerso y dedicacion pa nos studiantenan di Aruba y a expresa e compromiso di Arubahuis pa tin laso mas estrecho y cooperacion continuo cu e institutonan na beneficio di nos studiantenan di Aruba.

Leave a Reply

Top