Minister Chris Romero a presenta dos proyecto inovativo pa impulsa Aruba su agricultura

Den un conferencia di prensa Minister Chris Romero a presenta dos proyecto di gran importancia pa nos Sector Primario aki na Aruba.

Ta trata aki di proyectonan enfoca directamente pa e incentivacion di agricultura riba nos isla, pero tambe lo representa un fuente mas di cupo nobo di trabou pa nos localnan.

 

Despues di varios luna di preparacion pa por concretisa e proyectonan aki, finalmente diahuebs merdia e titular di e cartera di Sector Primario a presenta oficialmente na pueblo di Aruba e companianan Vertical Designs Aruba (VDA) y COBOTIX.

Ambos compania ta di origen Canades, pero ta estableci na Aruba oficialmente y cu e meta pa sirbi na beneficio di nos pais.

 

VERTICAL DESIGNS ARUBA (VDA) Y COBOTIX

Vertical Designs Aruba (VDA) ta un compania specialisa den plantacion di fruta y berdura. E sistema cu VDA ta uza ta basa riba un toren rotativo unda e matanan ta wordo planta y controla pa produci, den forma organico, diferente tipo di fruta y berdura.

E toren cu ta uza p’e proyecto aki ta un invento patenta pa sr. Nick Brusatore, kende t’e inventor, Presidente y CEO di e compania Affinor Growers na Canada.

 

COBOTIX t’e compania encarga cu fabricacion di e toren stainless steel cu VDA ta uza pa plantacion vertical. COBOTIX ta un compania ‘high-tech’ cu ta uza sistema di ‘laser’ y robot pa fabrica e torennan rotativo dirigi pa sistemanan computarisa.

Doño di e compania COBOTIX ta sr. Ron Adolf, kende a hiba palabra den nomber di su propio compania y (VDA) Vertical Designs Aruba.

 

CONTRIBUCION NA NOS ECONOMIA

No solamente e proyecto aki lo incentiva y aumenta nos produccion agricola na Aruba, pero tambe e lo nifica un aporte economico di alrededor di 20 cupo di trabou den su prome aña di funcionamento.

Logicamente segun e proyecto expande lo tin un crecemento consecuente cu lo yega te na 100 cupo di trabou den e añanan siguiente.

Esaki ta traduci den un crecemento economico adicional pa nos isla, como tambe un expansion di tecnologianan nobo den nos Sector Primario.

 

ARUBA LO BIRA E CENTRO DI ENTRENAMENTO Y CAPACITACION

E intencion di ambos compania, pero primordialmente di COBOTIX, ta pa Aruba bira e ‘showcase’ y ‘trainingcenter’ di personal cu ta bay traha cu e toren rotativo. Banda di esaki lo exporta tur peticion for di Aruba.

 

Minister Chris Romero a haci enfasis cu e lo desea p’e companianan aki traha den cooperacion cu nos cunukeronan local. Honrando e peticion di Minister, VDA a aserca e asociacion di cunukeronan UFA (United Farmers Association) p’asina tin e cooperacion estrecho cu Minister Romero ta desea.

Di e manera aki nos cunukeronan lo por siña tecnicanan nobo pa expende nan conocemento y haci e mundo di agricultura na Aruba mas grandi.

 

 

Leave a Reply

Top