Minister Dangui Oduber a bishita Aeropuerto riba “Super Saturday” pa wak e operacionnan

Minister encarga cu Turismo, Salubridad Publico y Deporte sr. Dangui Oduber a haci un bishita na Aruba Airport Authority N.V. (AAA), caminda el a haya un recorido amplio pa loke ta trata e operacionnan diario na AAA N.V., especialmente riba un “Super Saturday”.
Diasabra ultimo AAA N.V. a ricibi un total di 7000 pasahero. Un dia sigur sumamente druk cu na mesun momento ta trece diferente reto cune.

E weekend cu a pasa tabata un di e weekendnan di mas druk cu AAA N.V. a conoce, caminda mas cu 27000 pasahero ta sea yega of sali di Aruba. P’e motibo a invita Minister Dangui Oduber pa bin experencia con e departamentonan ta opera cu un fluho grandi di pasahero y espacio limita.

CEO di AAA N.V. sr. Fazio ta splica cu AAA N.V. ya caba ta haciendo su maximo esfuerzo caminda AAA N.V. ta conociendo cambionan pa amplia su servicio y seguridad p’e pasaheronan.
AAA N.V. a introduci e.o. diferente machine di servicio nobo cu ta haci cu diferente proceso di Imigracion y control ta bay mas liher.

“E capacidad di nos Aeropuerto ta den yega su limite y nos ta haciendo tur loke cu nos por pa tur facilidadnan funciona optimal.
Ta masha importante pa nos “streamline”. Actualmente aunke e pasahero nan ta yega 3 pa 4 ora adelanta aeropuerto, hopi biaha e tempo aki no ta yega pa nan por experiencia tur e facilidadnan cu AAA N.V. tin pa ofrece.”
Expansion di AAA N.V. sigur ta mas cu necesario mirando e crecemento den fluho di pasahero cu ta bishita Aruba y pa por sigi garantisa servicio y seguridad pa nos pasaheronan.

Minister Dangui Oduber a keda impresiona cu e gran calidad di operacion cu tin na AAA N.V.
E mandatario a keda sumamente contento di por a mira e operacion di serca y duna oido na tur e retonan cu AAA N.V. ta enfrentando.
AAA N.V. ta wordo maneha pa un team di profesional cu tin bon expertisio den nan trabou y cu sa atende cu tur e retonan na un manera diligente.

Minister Dangui Oduber sigur lo ta trahando di serca cu AAA N.V. pa yuda trece solucion y asina minimalisa e debilidadnan pa fortalece nos turismo, nos unico pilar economico.

Leave a Reply

Top