Minister Dangui Oduber a felicita Aruba Airport Authority N.V. y Aruba completo cu proyecto Gateway 2030

Dialuna atardi a tuma lugar conhuntamente cu Gobierno di Aruba, AAA N.V. y e lendernan, e “Official Financial Closing” p’e proyecto Gateway 2030. Manera ya ta conoci caba AAA ta bay conoce un reconstruccion y expansion p’asina por maneha e fluho creciente di pasahero y facilita nan experiencia di biahe y na mesun momento opera na un manera mas efectivo y sostenibel. Tambe e proyecto “Gateway 2030” tin como meta pa expande nos Aeropuerto den futuro p’asina por acomoda mas avionnan commercial.

“E ultimo renobacion di Aeropuerto tabata e proyecto “Beatrix 2000” cu a cuminsa den añanan 90. Awor mas cu 20 aña despues nos lo ta formando parti di un di e renobacionnan mas grandi den Historia di Aruba.”
Intencion di e proyecto ta pa transforma nos Aeropuerto actual den e mihor den Caribe. E proyecto aki sigur lo aporta na nos economia local y tambe yuda na engrandece nos turismo cu ta e unico pilar economico di nos pais Aruba cu ta genera casi 90% di nos entrada bruto nacional.

E proyecto Gateway 2030 lo ta un inversion di $275 miyon. E lo bay crea mas cu 400 cupo di trabou pa nos hendenan. E lo stimula nos economia, contribui na nos GDP y contribui na finanza di Gobierno di Aruba. Tempo di construccion lo tin un periodo di 5 aña.
Minister Dangui Oduber ta compromete su mes sigur cu nos turismo pa sigi fortalece esaki den uno solido.
Den nomber di Gobierno di Aruba, Minister Dangui Oduber a felicita Aruba Airport Authority N.V. y Aruba en general cu inicio di e proyecto Gateway 2030.

Leave a Reply

Top