Minister Dangui Oduber a ricibi e seleccion campeon di Junior League

Diahuebs merdia Minister di Deporte sr. Dangui Oduber tabatin e placer di por a ricibi e seleccion di Center League cu a titula campeon di Junior League Latino Americano na Blossoms Restaurant, pa lunch den un ambiente agradabel.
E muchanan a keda masha contento ora nan a ricibi nan regalito for di Minister.

E seleccion di Center League encabesa pa Elwin Rincones lo ta representando Aruba di dia 12 pa 19 di augustus benidero na Taylor, Michigan, USA den e Junior League World Series.
Nos tur ta corda e wega di final emocionante cu e seleccion aki a hunga contra e seleccion di Panama den Stadion di Nadi Croes/Crismo Angela. Un wega cu caba den extra inning unda cu e seleccion aki nunca a rindi y na final ta logra e victoria cu un score aplastante.

Minister Oduber a expresa cu e no tin duda cu e seleccion aki lo haci un tremendo trabou pa pais Aruba, nan a demostra di tin hopi curason y determinacion.
Esaki t’e dos yabinan clave pa titula campeon di mundo. Un danki sigur ta bay n’e mayornan, manager y coachnan cu ta duna di nan tempo pa apoya y yuda e muchanan aki den nan desaroyo. Un danki tambe n’e delegadonan cu ta compañando e seleccion aki. Minister Oduber a finalisa na desea e seleccion di Aruba tur clase di exito den e dianan benidero.

Leave a Reply

Top