Minister encarga cu Infrastructura Otmar Oduber: Den futuro mester enfoca mas riba balor agrega cu proyectonan infrastructural tin pa economia y medio ambiente di Aruba

Minister Otmar Oduber a reuni cu Director di DOW, ing. Marlon Croes y expertonan kendenan a duna presentacion di proyectonan di DOW na Minister y alabes tabatin oportunidad pa haci pregunta y asina wordo poni na altura di status di proyectonan cu ta andando, specificamente e concepto Public Private Partnership (PPP).

E concepto aki a wordo uza pa construi Green Corridor y Watty Vos Boulevard.

 

E presentacion di DOW tabata amplio y ing. Marlon Croes a splica for di inicio con e destaho a tuma lugar y e contract cu a uza p’e PPP-nan aki. Tambe a menciona e trabounan cu tin pa cumpli cu ne ainda y retonan pa por yega na finalisa e proyectonan aki.

Minister Oduber a haci varios pregunta n’e team di expertonan relaciona cu e costo di e proyectonan, responsabilidad y calidad di e trabou.

 

“E proyectonan PPP uzando Design, Build, Finance and Maintain (DBFM) contract ta duna Pais Aruba un otro forma di tene destaho publico, compara cu locual cu a haci tradicionalmente.

Den proyectonan tradicional: Ta traha un destaho, mester tene un ‘aanbesteding’, scoge e contratista cu su prijs ta mas mihor y ora cu e caba, e contratista ta bay y nos ta keda cu e mantencion p’e proximo añanan.

Sinembargo den caso aki (cu DBFM), ta transferi riesgonan di diseño, riesgonan di contruccion, financiamento y mantencion n’e Sector Priva.

 

E incentiva t’e parti financiero, locual kiermen cu e contratista lo haci su maximo esfuerso pa traha un diseño cu ta cumpli cu e rekisitonan cu Pais Aruba ta pidi, e ta construi esaki, financia esaki y ta haci mantencion p’e proximo 18 of 20 añanan. Den e proceso aki, si e no ta cumpli cu camindanan disponibel pa Pais Aruba funciona y no ta cumpli cu e parti di calidad, e no ta haya su pago.”

Marlon Croes ta enfatisa cu e contratista mester cumpli cu ambos, p’e por haya su pago.

P.e.: E caminda ta habri pa nos por core y despues di algun tempo a surgi buraco grandi, ta informanan cu e caminda tin buraco den dje y pues no ta cumpli cu rekisitonan cu ta den e contract, consecuentemente un boet lo wordo aplica.

 

Ora cu ta sera e caminda pa cumpli cu e trabou, ta haci cu e caminda no ta disponibel mas pa Pais Aruba uza, esey kiermen cu boet ta bin acerca atrobe. Cu boet kiermen, reduccion den pago cu lo wordo haci n’e contratisa. Unabes tin un boet/reduccion, e contratista no ta haya e suma bek ora cu e cumpli cu e trabou, e ta perde e parti di e pago aki.

E ta un trigger basta intensivo di parti Gobierno, pa stimula e contratista pa tene e caminda disponibel y n’e calidad cu ta rekeri, ing.Marlon Croes a splica.

 

Proteccion Pais Aruba den caso di ‘failliet’

Den caso cu e compania bay failliet pa Pais Aruba e no ta un problema di biaha. E financiador di e proyecto cu kier haya nan placa bek tin un ‘step in right’ cu Pais Aruba. Pues si e contratista bay failliet cual kiermen cu e no por duna e servicio mas y consecuentemente no tin pago ta tuma lugar.

Den e caso aki e financiadornan ta mustra e contratistanan riba e hecho cu nan a bay failliet, ta saca nan for di e ‘equation’ y ta pone un otro compania cu si por haci e trabou duna e servicio, pa por garantisa cu nan ta haya nan placa.

Esakinan t’e mecanismonan cu tin den e contract aworaki pa garantisa cu e caminda ta keda disponibel y n’e calidad rekeri pa nos por core.

 

Status proyectonan

Pa loke ta status di e proyecto di Green Corridor, esaki mester a wordo entrega na augustus 2017 cual nan no a logra. Nan a purba di entrega e proyecto november cual tampoco a logra.

Segun e contratisa 95% di e caminda ta cla y e 5% cu falta ta encera algun cos cu nan mester drecha ‘aki aya’.

Adicional, e contract ta rekeri cu organisacion administrativo mester ta bon, pasobra lo tin un relacion cu e compania pa 18 aña unabes nan caba cu e proyecto.

Esey kiermen cu nan mester prueba cu e organisacion ta bon hinca den otro, e parti administrativo ta bon hinca den otro y cu proceso di trabou ta bon hinca den otro pa por garantisa e servicio cu ta bay duna.

 

Pa loke ta ensera e proyecto Watty Vos Boulevard, e trabounan ta andando segun planificacion y ta spera cu e proyecto keda cla augustus 2019, ing. Marlon Croes a termina bisando.

 

Leave a Reply

Top