Minister Glenbert Croes ta sinti efecto di medida di Nicolas Maduro

Minister Glenbert Croes ta na Caracas, Venezuela, for di Pasco unda el a bay pasa e ultimo dianan di fiesta cu un ser masha keri pa su persona..
Minister Glenbert Croes tabatin intencion di bolbe diasabra ultimo, pero pa dos motibo no tabata por. Prome ta cu for di e momento ey, Presidente Nicolas Maduro a anuncia sierre di frontera aereo y maritime p’e islanan ABC.
Como tal Glenbert Croes, maske cu tabatin su ticket di regreso, no por a bolbe.
E di dos motibo ta, cu el a bira basta malo y mester a haya atencion medico na Caracas mes, unda nan a bis’e cu el a haya un virus sea via di awa of cuminda y cu mester di tratamento di inmediato.
Maske cu nos sa cu Glenbert Croes for di algun tempo caba ta confronta problema di salud, relaciona cu su cuero, pero esaki no t’e motibo ta pakico el a bay Venezuela, pero ta manera nos a splica caba.

E decision di Gobierno Venezolano pa sera espacio aereo pa 72 ora, nifica cu Glenbert Croes lo por ta bek diarazon awor, maske ta ser evalua si Minister Glenbert Croes por bin Aruba, via di un otro pais. Asina a ser pensa, cu e por bula pa Santo Domingo, cu e ticket di ASERCA, cu su doñonan ta di PAWA Airlines tambe y asina bin Aruba.
Of por tambe via di Colombia, si tin mester. Kier men, e propio Minister Glenbert Croes a sinti e efecto di medida di Presidente Nicolas Maduro, pa sera e fronteranan aereo y maritime pa Aruba, Corsou y Bonaire.

Siendo amigo di Nicolas Maduro, nos no sa su Minister Glenbert Croes por e informa e Presidente di Venezuela, cu e ta fout bezig, si analisa e motibonan pakico el a dicidi di sera e fronteranan aki pa 72 ora cu posibilidad di bin cu medida mas pisa ainda, segun e propio Nicolas Maduro.

Leave a Reply

Top