Minister Otmar Oduber: Problema di Gobierno anterior tabata nan moralidad

Anteriormente ex Minister Benny Sevinger tabatin 72 coordinador for di cual 16 di nan tabata ambtenaar kendenan a bay bek nan departamento ora cu e Gobierno a wordo manda cas.

Como consecuencia di esaki ta resta 56 persona di e Ministerio anterior cu tabata maneha pa sr. Benny Sevinger.
E payroll di e 72 personanan aki cu tabata cay bou di e Minister anterior encarga cu Infrastructura tabata 7 miyon 834 florin pa aña.

Minister Otmar Oduber ta puntra sr. Benny Sevimger y esnan di partido AVP kico mester pasa cu e personanan aki aworaki cu e Gobierno ya no tey mas y a bay laga nan atras.
Den e grupo di coordinadornan aki, varios a wordo manda na departamentonan caminda cu tin vacatura di 8 hende y nan a manda 7 mas, ampliando esaki na 15, kibrando e ‘formatieplaats’ .

Si no tin espacio pa tanto hende labora na un departamento, esey kiermen cu no tin presupuesto tampoco.
Pues a engaña e hendenan aki y a uza nan durante tur e añanan y no a regla un departamento of sitio apropia pa nan traha.

‘E ta hopi baho pa un ex Prome Minister ataca Director di DRH aworaki sabiendo e situacion cu nan mes a crea y laga atras cu e entre 200 pa 300 coordinador.
E ex Ministernan cu ta actualmente den fraccion di AVP tabata den Conseho di Minister y a bay di acuerdo na 2009 cu e proposicion cu e tempo ey ami a bin cu ne cu ta ensera pa no honra decisionnan cu huridicamente no tin placa pa cubri esakinan.

Esaki t’e situacion cu ta ripiti su mes actualmente, nada diferente. Pues ora cu AVP kier keda pusha den medionan di comunicacion cu ta persecusion politico tin, ta obvio cu esaki no t’e caso”, segun Minister Otmar Oduber.

Hecho ta, cu como Gobierno a bisa, ‘mi ta bin cu mi hendenan, y mi ta bay cu mi hendenan’. Sr. Mike Eman a bisa hopi dramatico cu e si no ta para pa kita hende, sinembargo dia cu mi a bandona e Gobierno di AVP dia 3 di november 2016, el a kita decenas di hende cu a vota pa AVP, pero cu a vota y traha pami. Pues cu ki moral awe e mesun sr. Mike Eman kier bin bisa cu e no a kita ningun hende.’

Consecuentemente, aworaki ta un liña ta wordo marca tras di henter e situacion aki y si den futuro tin funcion habri, necesidad, presupuesto y e persona ta cumpli cu e exigencianan p’e funcion, E personanan aki lo ta prome pa bin na remarca pa haya e trabou n’e departamento bek. pasobra ta compronde cu na final tur hende ta traha pa nan pan y pa cria nan famia, Minister Otmar Oduber a conclui.

Leave a Reply

Top