Muher ta dal cu su auto contra rotonde di Drive In

Diahuebs algo prome cu 11’or di anochi ta sosode un accidente cu un persona herida y hopi dañonan material na rotonde di ex Drive In.
Un Suzuki preto, maneha pa un señora, tabata biniendo di pariba, cu velocidad halto, esta chofer femenino a perde control riba e stuur, a dal contra e rotonde. E impacto fuerte a causa hopi daño material n’e auto y n’e rotonde tambe.

Riba e caminda tabatin hopi resto di beton procedente di e rotonde, tambe tabatin azeta basha riba e caminda esaki a basha despues di e impacto fuerte.
Polis n’e sitio a pidi pa presencia di brandweer pa haci e caminda riba e rotonde limpi, mirando cu tabatin basta pida piedranan y azeta gespart.
E dama chofer probablemente  bou influencia, tabata keha di dolor den pecho. Den e impacto cu su pecho el a kibra e stuurwiel.

Esaki ta un indicaccion di con fuerte e impacto tabata. Na prome instante e señora no kier a haya asistencia medico di personal di ambulance, pero despues mirando e dolornan fuerte cu e tabata hayando, no a keda e señora nada otro di acepta asistencia medico di ambulance pa despues cu personal di ambulance a prepara e señora n’e sitio, pa transport’e pa hospital.

 

Leave a Reply

Top