Na Hulanda….OM a pidi 11 aña di prizon pa asesino Curasoleño Roichel

ENSCHEDE – Diabierne mainta Ministerio Publico den tribunal penal na Enschede a pidi 11 aña di castigo di prizon pe Curasoleño Roichel H., di 45 aña di edad pa asesinato di e panadero-traficante di droga Hulandes Alex Jaspers Focks. E asesinato a tuma lugar dia 9 di januari aña pasá na Enschede.

 

Focks tabata doño di un panaderia, pero esey tabata fachada p’e berdadero negoshi di cultivacion di marihuana y hennep riba un plantacion cu e tabatin tras di su panaderia.

Roichel H. a admiti cu el a mata Focks despues cu nan tabatin un pleito, pasobra Focks tabata debe Roichel 60.000 euro dje droga cu Focks a bende y keda cu tur e placa.

Den Corte Fiscal a conta detaye dje caso splicando cu Focks tabata un homber manera Hulk, masha grandi y masha duro.

E tabata socio cu Roichel, kende tabata un homber di estatura mediano y Focks a hise na su garganta manda laira y choké pa mata.

 

Roichel kende ya caba a cuminsa mira imagen di bida despues di morto, no a pèrdè pa gana y a saca su pistol tira Focks, pasobra fisicamente e no por a haci e homber nada.

Roichel a conta Polisnan cu te cu Focks a cumpra e arma pa protehá e plantacion di droga si acaso piratanan bin tira atraco riba e droga.

Roichel a tira Focks diferente biaha y ora el a bay suela el a keda suela morto-morto.

Roichel a declará cu ta den defensa propio el a actua, pasobra Focks tabata asfixiando su persona. corte lo dicta sentencia aki tres siman.

 

Alexander Focks su panaderia tabata yama ‘Alexander’s Brood & Banket’ den Lipperkerkstraat.

Pero no ta di su panaderia so e tabata gana placa, pasobra djis eybanda den Perikweg e tabatin un plantacion di marihuana y hennep.

Jaspers Focks tabata un homber poco bagamundo y tabata bon amigo cu doño di Club Eva cu ta empleá ‘dama di compania’ na Hengelo cu Focks tabata transportá e prostitutanan p’e clup di su amigo.

 

E mesun luna Polis a arestá e Antiano Roichel, kende naturalmente no tabatin adres permanente na Hulanda, pero nan a listra tambe den tres cas na Hengelo y Enschede caminda e sa keda rancha.

E dia fatal Roichel tabata apenas un minüt den e panaderia pa papia cu Focks riba e debe di 60.000 euro cu tabata parti dje ganashi di benta di e droga.

Pero na lugar di papia, Focks a hisa Roichel, kende a cana bay, pero ta Focks a bin su tras riba kual el a tira e makamba 5 biaha.

El a tir’é promé na su pia, pero Focks a sigi bin riba dje y eynan el a tir’é mata.

 

Leave a Reply

Top