Parlamentario Daphne Lejuez (MEP) ta cuestiona e desicion di Minister Lampe pa implementa sistema multilingual na scolnan local

Den un post riba su pagina di facebook, Parlamentario pa e fraccion di MEP, sra. Daphne Lejuez, a cuestiona y hasta condenan te cierto punto e decision di Minister Rudy Lampe di implementa un sistema multilingual/papiamento na tur scol di Aruba (menos SPCOA).

 

“Cu hopi sorpresa y preocupacion a tuma nota di un decision drastico cu a wordo tuma pa implementa Scol Multilingual/Papiamento na tur scol di Aruba (menos SPCOA) per 1 Januari 2018 (den menos di 3 siman!), sin a duna un presentacion ni splicacion na Parlamento encuanto e decision aki cu lo por afecta nos muchanan y nan oportunidad pa por expande nan conocemento den futuro, mirando cu nan lo mester tin un conocemento amplio di e idioma Hulandes na nivel di instruccion pa por califica y ta exitoso na un Mavo/Havo/Vwo.” Tabata expresionnan haci pa e Parlamentario di e fraccion di MEP, kende a tuma Facebook como e medio pa expresa su preocupacion, como cu ta via Facebook e lo a haya sa di e decision aki.

 

“Ta lamenta cu no a haci e resultado di e onderzoek aki publico, mirando cu aparentemente e lo a wordo haci pa e mesun profesionalnan cu ta esnan cu ta sostene e Scol Multilingual y no pa un instituto independiente y obhetivo…

Enves di bay enfoca solamente riba idioma, kisas lo tawata miho pa enfoca riba e condicion di cuido den scolnan pa asina percura pa un ambiente unda cu ta duna nos muchanan estimulo pa siña, percurando cu nan barica ta yen, nan docentenan ta motiva y cu nan tin material innovativo pa traha cun’e enbes di kopietjes. Ban papia di Zorgplicht y Passend Onderwijs …”

Segun Parlamentario Lejuez, e decision aki por afecta e futuro di e studiantenan cu lo tin aspiracion di sigui cu nan estudio na Hulanda, como cu pa nan por cualifica na un scol aya, e studiante lo mester tin un nivel instructivo di Hulandes.

“Mientras berdad Unesco ta boga pa haci uzo di lenga materno, na mes momento tambe ta bisa cu muchanan tin e derecho pa por tin oportunidadnan social/economico. Pa por logra e ultimo mester tin un dominio extenso di “schoolse taalvaardigheid” (dus idioma di enseñansa riba nivel academico) pa por bin na remarca y por sigui enseñansa avansa …

Nada contra nos idioma Papiamento, pero enberdad esaki lo ta e unico forma pa por mehora e resultado di enseñansa na Aruba? Na Corsou esaki no a bay manera premira …

Mi ta spera cu nos por haya un splicacion y un onderzoek independiente y obhetivo tocante e intencion aki mirando cu ta trata aki di e futuro di nos yiunan y nos pais.” E Parlamentario a conclui bisando.

 

Top