Parlamentario Marlon Sneek no por kere – Enbes di traha riba Presupuesto, paranda di keiromento a cuminsa

Ta cu asombra e lider di fraccion di AVP Marlon Sneek a bisa cu el a tuma nota con un biaha mas miembronan di e Gobierno aki ta bisa un cos durante campaña y despues den Gobierno ta haci algo otro. E tabata referi na e biahamento cu a cuminsa caba y pa cual MEP semper tabata conoci p’e.

“A tuma nota di e paranda di keiromento,”  segun Marlon Sneek. El a sigui bisa cu sra. Evelyne tabata critica y grita tur dia cu Gabinete Mike tabata gasta un cantidad di placa den biahamento y cu nan lo corta den esaki, y uza e placa aki den enseñansa y salubridad publico. Reaccionando riba esaki, e Parlamentario ta bisa cu nan por a demostra via di cuentanan anual di 2016 cu a caba di drenta cu e situacion ta diferente loke nan ta bisa. E relato ta bisa cu Gabinete Mike Eman a gasta 1.5 miyon den biahe, y cual ta encera e departamentonan tambe, en comparacion cu e 2.5 miyon cu a gasta den 2009, cual tabata e ultimo Gobierno di MEP, Gabinete Oduber II. “E retorica di sra. Evelyn Wever Croes nunca tabata berdad. Pero loke si ta berdad y por mira esaki ta cu nan a start atrobe cu biahamento.”

Sneek a bisa cu dia 17 di november e Gobierno nobo a huramenta y dia 23 caba algun a bay keiro na Merca. “Awe nan kier bin papia cu tin problema den finanza publico. Talbes nan no a tuma nan rol na serio y percura pa nan ta na Aruba pa atende cu e asunto aki. Ora cu nos a kere cu esey ta tur, tin un Gevmin cu a bay Hulanda y 4 dia despues e ta na Aruba atrobe. El a bay Hulanda siman pasa, y nos por a compronde e ta caminda pa Italia awo. Nos ta spera cu esaki ta un joke, pasobra mi no por kere cu sr. Besaril ta bay haci e tipo di cosnan aki. E no ta duna e tipo di seriedad den e trabou cu e tin di bay desplega na Hulanda.”

Pero no ta e so, Sneek a bisa.  Tin mas Minister cu a biaha. Tin dos Minister cu a biaha pa Miami, di cual un di nan prome cu esey a bay wapa na Boneiro, a yega Aruba y subi avion bek.  Informacion cu AVP a ricibi cu e encuentro na Miami tabata un simpel presentacion di algun linea crucero. Den pasado tabata director di APA tabata esun cu ta representa Gobierno den tipo di eventonan asina, hunto cu esnan di ATA cu ta encarga cu e seccion di Cruise Tourism. Pero e biaha aki dos Minister a biaha bay te Merca, gastando placa di pueblo. Nan mester ta na Aruba, pa atende e record kibra, bou di e departamento di e Ministernna aki, y cual ta algo cu a wordo logra door di maneho di Gabinete Mike Eman II. A supera 700 mil bishitante crucero pa prome biaha. Tur esaki mientras cu por a scucha Minister di Finanza ta manera cuminsa prepara pueblo pa medida. “Con serio e Gabinete aki por ta, si nan no ta sinta den nan oficina, nan no ta trahando pa e presupuesto cu mester wordo presenta. Y Minister di Finanza ta papia cu no tin placa.

 

 

 

 

Leave a Reply

Top