Parlamentario Marlon Sneek: No ta CITGO pero RDA mester paga 70 miyon florin

Wega ta wordo haci pa por bende FMSA cu sponsernan di campaña

 

AVP diahuebs mainta a tene su tradicional Conferencia di Prensa, unda cu un di esnan cu a hiba palabra tabata Parlamentario Marlon Sneek. El a bay riba diferente tema, entre e reunion cu Prome Minister di Aruba a tene cu su colega di Hulanda via di un tele-conference, pero tambe a cuestiona e e bruhamento di tera entre CITGO y RDA pa loke ta e suma di 70 miyon florin.

Den un otro parti di su declaracion el a papia tambe di e paranda di keiromento cu a cuminsa bou di e Ministernan y cu Parlamento no ta na altura di e biahenan aki. Asina el a bay riba e prome reunion cu Prome Minister Evelyne Wever Croes a tene cu Prome Minister di Hulanda, Mark Rutte, via di telefon. “Kisas e por splica su coleganan pa tambe cuminsa reuni via di telefon, y e ora ey no tin mester di gasta placa di pueblo den biahe.” Den mesun rosea e ta puntra su mes si no ta miedo Wever Croes tabatin pa bay Hulanda y atende cu e incapacidad di su Gabinete pa presenta un presupuesto.

Papiando di e presupuesto, tambe nan di AVP a scucha e mandatario bisa cu CITGO o tin placa pa paga e 70 miyon cu nan mester paga. “Mi ta mira cu tin un wega di palabra tumando luga, bruhamento di tema, p’asina cu esnan cu no sa di e tema cay den nan trampa, pa ora cu nan bini cu medidanan trata di hustifica esaki.” Pa ta cla, el a bisa, CITGO ta pagando locual cu nan mester paga. Esaki ta encera e suma di “lease agreement”, y tur luna ta paga 1/12 parti di e suma cu nan mester paga. Pero tambe e minimo di impuesto cu a palabra den e acuerdo, y cu esaki mester wordo paga sin importa ningun situacion.

E 70 miyon cu ta tira den boca di pueblo, e Parlamentario a splica, ta un suma cu Refineria Di Aruba (RDA) mester paga pa e parti di FMSA (Fuel Marketing & Supply Aruba) cu a wordo poni bou di nan y cu nan a cumpra. E suma aki pues no tin nada di haci cu CITGO. Valero tabata cera y e compania aki a sigui draai. “Pues si e refineria no t’ey mes, RDA y MFSA lo sigui opera. E ta algo completamente apart di CITGO. Nan mester a haci un procedura pa yega e 70 miyon cu nan tin cu paga Gobierno. Y aña no a finalisa ainda. Ademas Departamento di Belasting no a cera buki y no tin tur cifra disponibel.”

El a bisa tambe cu e unico motibo cu e 70 miyon no drenta ta si Gobierno a duna e ordo na RDA pa para e compra di FMSA y cu nan (Gobierno) kier bende e compania aki cu un otro persona. “Esey tambe por sosode. Nos sa cu den pasado e doñonan di e partidonan cu ta den Gobierno tabata loco pa cumpra e compania FMSA, pa pone man riba dje. Kisas esey ta andando y ta crea un smokescreen pa por bend’e cu doño di e partidonan cu ta goberna e pais aki. Esaki no por, pasobra nos a bisa cu e compania ta keda como un patrimonio di e pais aki y pesey a pone bou di RDA, pa nan por tin nan entradanan. Pero mi no ta strañami cu doñonan di partido ta poniendo presion pa cumpli cu sponsernan.”

El a finalisa bisando cu no ta por t’asina cu partidonan ta sinta y ta coy patrimonio di e pais aki y hink’e den man di terceronan, pasobra nan a hinca placa den campaña.

 

 

Leave a Reply

Top