Parlamentario Richard Arends ta sigura cu Den ningun negoshi di CITGO detencion di ehecutivonan tabatin consecuencia

E ta puntra dicon e lo mester afecta Aruba so, manera Gobierno ta bisa

 

Gabinete Mike Eman II a haci un palabracion cla cu Refineria di Aruba riba e placa cu nan tin cu paga pais Aruba. Esaki mester sosode e luna aki. Asina Parlamentario Richard Arends a bisa den un combersacion cu AWEMainta a sostene cun’e.

E ex Minister encarga cu Asuntonan Economico a bisa cu den luna di october RDA a haci un compromiso cu Gobierno di Aruba cu pa dia 31 di december, 2017 nan lo mester paga loke debe ainda di e “settlement” y loke mester paga pa e compra legal y economico, esta e suma di transferencia di e empresa Fuel Marketing & Supply Aruba. E hecho cu nan a cera top di CITGO no tin nada di haber cu e hecho cu RDA ta cumpra FMSA, Arends a splica.

Manera ta  conoci, den e acuerdo cu a yega na dje, a dicidi pa pone FMSA den un forma temporal bou di RDA. E motibo ta cu RDA ta e empresa cu mester cumpra e accionnan di FMSA, pero nan mester a busca e financiamento necesario di e compra legal. A palabra cu e suma aki ta wordo paga na december, 2017. Pues nan tin te cu dia 31 di december ainda pa haci e pago necesario, esta di 73 miyon florin.

Tambe e ex mandatario a bisa cu te e momento cu e tabata Minister, e empresa semper a cumpli cu tur su debernan. Esaki ta pago di huur di e instalacionnan di e refineria na Refineria di Aruba y tambe e belastingnan necesario na Pais Aruba. Como cu e tabata e persona encarga pa vigila cu CITGO ta cumpli cu su debernan y a constata cu semper e placa tabata drenta 5 di tur luna den caha di Gobierno.

Loke cu hopi hende kier sa ta kico ta bay pasa cu e refineria awor, despues di estafa descubri cu a conduci na detencion di 6 ehecutivo di e compania, entre otro e director di CITGO Aruba. Segun e Parlamentario a splica, di loke e ta na altura di dje, e trabounan ta sigui manera semper. E personanan deteni ya caba a wordo reemplasa y tanto CITGO Petroleum como CITGO Refinery ta keda cu nan obligacionnan. E empresanan a keda opera normal despues di e sucedido, manera semper. No mester lubida cu CITGO Petroleum ta doño di tres refineria na Merca, tambe nan tin seis terminal y, manera ta conoci, a huur un refineria di Aruba. Na tur e otro propiedadnan di CITGO, e operacionnan a sigui normal manera semper. “E sucedido no tin efecto ni na Merca ni Aruba. E no tin sentido cu door cu e detene e hendenan aki, negoshi ta stop. Si nan no ta cumpli cu Aruba, of kier stop nan trabou aki,  nan mester a hacie na tur otro caminda na Merca tambe. Y esey no ta e caso.”

 

Leave a Reply

Top