Parlamentario Rocco Tjon ta splica mas di e Landsverordening Internationale Bijstandsverlening van Belastingen (LIBB)

Recientemente tur fraccion den parlamento unanimamente a aproba e “ontwerp Landsverordening Internationale Bijstandsverlening Belastingen”. E ley aki ta di suma importancia mirando e dinamismo di nos mundo caminda ciudadano nan ta establece nan mes den exterior, of ta haci negoshi den exterior sin kibra laso cu nan pais di origen. Consecuencia di e desaroyo aki ta cu e ta bira difícil pa gobiernonan haña informacion esencial y necesario pa loke ta trata impuesto. Tocante esaki Parlamentario Rocco Tjon ta elabora:

 

Tratado

29 di october 2014, Aruba a firma un tratado pa asina intercambia automaticamente informacion financiero entre institutonan financiero y e departamento di impuesto di e pais en cuestion. E “multilateral competent authority agreement”  aki ta e base legal pa por intercambia informacion. Na mes momento tambe a firma e “common reporting standard” den cual ta prescribi e manera con e informacion aki lo mester wordo comparti y cua informacion specifico mester wordo comparti. Door di firma e tratado Aruba como pais a compromete pa mas tarda den september 2018 intercambia informacion automaticamente pa loke ta trata e aña 2017.

 

Importancia di e LIBB

Cu aprobacion di e LIBB Aruba lo wordo caracterisa como un pais cu otro paisnan y institutonan financiero por traha safe cu ne. Importante ta pa nota cu e no tabata posibel ainda pa automaticamente ricibi, provee of intercambia informacion financiero. Aunke cu den e “Algemene landsverordening belastingen” algun cos ta wordo regla esaki ta limitia y no ta haci’e possibel pa ley y ni obligatorio. Adicional e LIBB tin incorpora un asina yama “delegatiebepaling” a base di cual e intercambio di informacion por wordo regla na “landsbesluit”. Y esaki ta un aspecto di suma importancia mirando e dinamismo di nos mundo.

 

Votacion

Fraccion di MEP a vota na favor di e ley menciona pa e motivo cu e ley ta haci’e posibel cu Aruba como pais ta “compliant” cu tratadonan y tambe mirando e hecho cu e ley aki a cana e caminda corecto. Raad van Advies a scrutina e ley y a tene cuenta cu e remarkenan di Raad van Advies. Fraccion di MEP ta spera cu e manera profecional cu tur fraccion a hiba nan discurso y e manera profecional con Presidente di Parlamento sr. Mr. Ady Thijsen a lidera e reunion publico ta e manera con debatenan y reunion den futuro lo ser hiba”, e Parlamentario ta termina ta bisa.

 

 

Leave a Reply

Top