Parlamentario Shailiny Tromp-Lee (MEP) ta felicita Jonathan Thiel ‘Jeon’

Siman y weekend tras di lomba tabata uno grandi. Un tremendo logro di un artista local hoben y talentoso. Banda di ta un logro profesional personal pa Jeon, esaki sigur ta un orguyo pa nos tur cu ta biba aki na Aruba. Un orguyo pa mira Jeon debuta mundialmente hunto cu J. Balvin y Anita.

Loke ta di aplaudi ta e echo con Jeon ta duna promocion na e 3 islanan cu ta papia Papiamento door di menciona nan den e videoclip ‘Aruba- Boneiro y Corsou’. Alabes Jeon ta duna atencion mundial na nos lenga materno door di a agrega algun frase na Papiamento den e cancion.
Un hoben cu na su manera ta mustra con hopi e ta stima e dushi pida baranca aki y con orguyoso e ta di su lenga materno Papiamento.

Durante fin di siman mi a scucha un entrevista cu Jeon na un radio emisora caminda ta keda puntra na Jeon si e por tin un conseho pa nos artistanan hoben. El a contesta: ‘Pa nan sigui soña… Pero soña grandi! Tur cos ta posibel!’. Mi ta convenci cu e filosofia di bida aki ta loke a yuda Jeon yega unda e ta awe. Un pabien na Jeon, su mayornan y henter su famia. Boso por ta hopi orguyoso! Aruba ta orguyoso!

Top