Parlamentario Sue Ann Ras (MEP): Un parti hopi grandi di e problemanan social tin di haber cu e resultadonan di scol

Departamento di Asuntonan Social a saca den nan “Social Development”, na februari 2017 y di pagina 37 te cu 57, nan ta papia y ilustra e gran problematica  di enseñansa. Ta referi na e tipo di enseñansa cu nos tin na Aruba y ki influencia e tin riba e desaroyo social y economico di Aruba. E problemanan cu nos ta encontra den e parti social, cual tin un parti hopi grandi mes, tin di haber cu e resultadonan di scol y maneho di idioma na nos scolnan.

 

Centraal Bureau Statistiek (CBS) a saca tambe na aña 2000, unda a midi e forsa laboral na Aruba, cu 65% di nos poblacion, unda 22.199 persona, cu ta 33.9 % di nos poblacion ta riba nivel di scol basico. 11.352 ta riba nivel di un LBO/EPB cu ta 17.3% di nos poblacion, riba e nivel di MAVO ta 9.544 cu ta 14.6% di nos poblacion. Na  aña 2000 e tempo ey, cu Aruba lo tabata tin 65 mil habitante, cual 43 mil hende mas o menos tabata riba un nivel di MAVO bay abou. E minoria so tabata disfrutando di un enseñansa di calidad y no e mayoria.

 

Mas di 60 % ta ganando un salario minimo, ta fayando den nos sistema di enseñansa, no ta brindando nos muchanan un enseñansa di calidad y tur raport ta demostra esaki. E momento a yega pa nos para keto y mira kiko nos ta haciendo den nos enseñansa, resistencia lo haya, cambio no ta facil. E mayoria ta demostrando cu  nos enseñansa ta fayando y cu Gobierno mester traha pa e mayoria, paso e mayoria tambe tin derecho di disfruta di un enseñansa di calidad.

 

Otro aña ta cuminsa cu e proyecto di scol multilingual. E ta un proyecto cu ta bay den fase, no ta yega drenta y ta cuminsa di biaha cu ne. E prome fase ta bay ta for di januari 2018 te cu juli 2018, e fase di orientacion. Kemen cu e docentenan di e scolnan basico y preparatorio lo haya full e fase di orientacion aki, unda nan lo mester bay na  compronde e motibo, e consecuencia y pakico nos tin cu bay den e direccion aki. E parti di scol multilingual no ta na Aruba so. Nos ta proclama cu nos ta un pais multilingual, esey kemen cu nos tin cu dirigi nos enseñansa, na locual ta den e ambiente di e mucha tambe. E implementacion di e scol multilingual cu e Minister a referi na dje, ta e prome fase di orientacion cu lo inicia na januari 2018 te cu na augustus 2018. Despues lo cuminsa cu e di dos fase cu ta e parti di preparacion, planicifacion, mira kico lo por a bay malo y cu lo mester mehora y na augustus 2019 ta poni pa ehecuta e proyecto.

 

E proyecto di scol multilingual lo cana den fase y no pensa cu ta boycoteando Hulandes of lagando e Hulandes afo. Alcontrario ta bay fortalece e Hulandes cu e sistema aki y esaki ta comproba cientificamente. Pues no ta cuestion di un mito, pero tin e pruebanan, cu si hende kier algo bon e ta bay tras di investigacion y no mito.

 

Top