Polis ocupa cu bendedo di droga y intrusonan

Diadomingo ultimo algun rato despues di mey anochi Central ta manda patruya na Casa Cuna, unda cu desconocidonan a purba di drenta.

Na e sitio e polisnan ta papia cu e leidster, kende a declara cu un rato prome un hende tabata na porta, banda pariba di e edificio, y a bati na dje. Polis a controla rond di e edificio, pero no a mira nada. Despues patruya, hunto cu e directora a bay controla e camara di siguridad y a mira cu berdad un persona desconoci a bula den e tereno di Casa Cuna, door di bula e muraya. Patruya a listra henter e bisindario pero no a mira ningun hende. Central a wordo poni na altura.

Un informe di Polis ta bisa cu diadomingo ultimo den oranan di madruga, 02.10,  polis a bin topa, durante patruya den Ranchostraat, e conocido Kabouter.

Ora cu el a mira polis, el a cuminsa comporta sospechoso y nervioso. Ora cu a controla su paña, a bin topa cu un saco chikito di plastic, den dje a haya 9 sakito mas transparente cu den dje piedra di cocaina. Kabouter a wordo deteni y hiba warda di Playa.

No ta na Casa Cuna so pero tambe na Sabana Blanco a mira hende canando den cura di cas den oranan di madruga. Esaki tabata pa 2.59 di madruga. Central ta manda patruya di Playa na un adres na Sabana Blanco pa un persona sospechoso kende lo mester tabata canando den cura. Eynan a papia cu un habitante yama K., kende a declara cu algun minuut prome, un homber desconoci tabata cana tras di su cas. Segun cu K. ta declara, dicho homber tabata canando pazuid di su cas, direccion pabao y a bula e cura. Polis a controla den bisindario y no a mira nada straño.

 

Leave a Reply

Top